शरद पवार नाट्यसंमेलनाचे स्वागताध्यक्ष 

मुंबई : अखिल भारतीय मराठी नाट्य परिषदेच्या 100 व्या नाट्यसंमेलनाचे स्वागताध्यक्षपद राष्ट्रवादी कॉंग्रेसचे राष्ट्रीय अध्यक्ष शरद पवार यांनी स्वीकारले. याची माहिती त्यांनी स्वतः ट्‌विटर हॅंडलवरून सोमवारी दिली. अखिल भारतीय मराठी नाट्य परिषदेचे अध्यक्ष प्रसाद कांबळी आणि नाट्य परिषदेच्या नियामक मंडळ सदस्यांनी पवार यांची चर्चगेट येथील यशवंतराव चव्हाण प्रतिष्ठान येथे सोमवारी भेट घेऊन स्वागताध्यक्षपद स्वीकारण्याची विनंती केली. ही विनंती स्वीकारत असल्याचे पवार यांनी सांगितले. 

हेही वाचा - नवी मुंबईत निवडणूकीपूर्वी लिंबू-मिर्चीचा खेळ चाले...

शरद पवार हे अखिल भारतीय मराठी नाट्य परिषदेचे विश्‍वस्तही आहेत. त्यांनी स्वागताध्यक्षपद स्वीकारल्यामुळे 100 व्या नाट्यसंमेलनाला अधिक बळ आले आहे, अशी भावना नाट्य परिषदेचे अध्यक्ष प्रसाद कांबळी यांनी व्यक्त केली. नाट्यसंमेलनाचे उद्‌घाटन (27 मार्च, सांगली) आणि समारोप (14 जून, मुंबई) या दोन्ही कार्यक्रमांना ते उपस्थित राहतील. राज्यभरातील कार्यक्रमांची आखणी सुरू असल्याने स्वागताध्यक्ष इतर कोणत्या ठिकाणी उपस्थित राहू शकतील याची माहिती लवकरच देण्यात येईल, असेही कांबळी म्हणाले. 

 महत्त्वाची बातमी - शिवसेनेने ठरवले तर भाजपला मुंबईत फिरणे अशक्य!

अखिल भारतीय मराठी नाट्य परिषदेच्या सदस्यांनी सोमवारी मंत्रालयात सांस्कृतिक कार्यमंत्री अमित देशमुख यांचीही भेट घेतली. देशमुख उद्‌घाटन आणि समारोपाला उपस्थित राहतील का, याबद्दल सध्या काही सांगता येत नाही, असेही नाट्य परिषदेकडून सांगण्यात आले. सोमवारच्या भेटीत अनुदानाबद्दल चर्चा झाली नाही. कार्यक्रमांची आखणी झाल्यानंतर अनुदानासाठी अर्ज करण्यात येईल, असे नाट्य परिषदेने स्पष्ट केले आहे. 

"समस्या पोहोचतील' 

आगामी काळात राज्यपाल, मुख्यमंत्री, उपमुख्यमंत्री व मंत्र्यांचीही भेट घेण्यात येईल. यंदाचे नाट्यसंमेलन राज्यात वेगवेगळ्या ठिकाणी होणार आहे. त्यामुळे ठिकठिकाणचे आमदार नाट्यचळवळीशी जोडले जाऊन स्थानिक कलावंतांच्या समस्या त्यांच्यापर्यंत पोहोचतील, अशी आशा नाट्य परिषदेने व्यक्त केली आहे.

Web title : Sharad Pawar will be President of natyasamelana