Mumbai News : शिखर बँक प्रकरण! प्राजक्त तनपुरे, रणजित देशमुख, अर्जुन खोतकरांना न्यायालयाकडून समन्स

मुंबई - महाराष्ट्र राज्य सहकारी बँक उर्फ शिखर बँक प्रकरणात ईडीने दाखल केलेल्या पुरवणी आरोपपत्राची विशेष न्यायालयाने दखल घेतली आहे. तसेच, माजी मंत्री आणि राष्ट्रवादी काँग्रेसचे नेते प्राजक्ता तनपुरे आणि त्यांचे वडील प्रसाद तनपुरे यांना समन्स बजावले.

काँग्रेस नेते रणजीत देशमुख, शिवसेना नेते अर्जुन खोतकर, बांधकाम व्यावसायिक जुगल किशोर तापडिया आणि उद्योगपती पद्माकर मुळ्ये यांच्यासह या प्रकरणातील अन्य आरोपींनाही विशेष न्यायालयाने यावेळी समन्स बजावले आहे. त्याचप्रमाणे, या सगळ्यांना 12 जानेवारी रोजी न्यायालयात हजर राहण्याचे आदेश दिले. ईडीने या प्रकरणी दाखल केलेल्या दोन पुरवणी आरोपपत्रांची विशेष न्यायालयाचे न्यायाधीश राहुल रोकडे यांनी दखल घेतली.

तसेच, आरोपींना समन्स बजावून हजर राहण्याचे आदेश दिले. तनपुरे हे महाविकास आघाडी सरकारमध्ये नगरविकास, ऊर्जा, आदिवासी विकास, उच्च आणि तंत्रशिक्षण आणि आपत्ती व्यवस्थापन राज्यमंत्री होते. त्यांचे वडील प्रसाद तनपुरे हे माजी खासदार आहेत.

सहकारी साखर कारखाने आणि सहकारी सूत गिरण्यांमधील कथित आर्थिक गैरव्यवहाराशी संबंधित प्रकरण आहे. मुंबई पोलिसांच्या आर्थिक गुन्हे शाखेने ऑगस्ट 2019 मध्ये या प्रकरणी गुन्हा नोंदवला होता. त्याच्या आधारे ईडीने या प्रकरणी कारवाई केली होती.

ईडीच्या आरोपानुसार, प्राजक्त तनपुरे यांच्या प्रसाद शुगर ॲण्ड अलाईड ॲग्रो प्रॉडक्ट्स लिमिटेड या कंपनीला राम गणेश गडकरी सहकारी साखर कारखाना हा 26.32 कोटी रुपयांऐवजी केवळ 12.95 कोटी रुपयांना विकला गेला. हा कारखाना बेकादेशीररीत्या विकत घेण्यात आला आणि त्यातील पैसे हे आर्थिक गैरव्यवहाराचे असल्याचेही आरोप पुरवणी आरोपपत्रामध्ये करण्यात आले आहे.