Ulhasnagar : उल्हासनगरातील पप्पू कालानी हेच सिमेंट काँक्रीटच्या रस्त्यांचे प्रणेते ; खासदार डॉ.श्रीकांत शिंदे यांची जाहीर पोचपावती

उल्हासनगर : खासदार डॉ.श्रीकांत शिंदे यांनी उल्हासनगरात आयोजित करण्यात आलेल्या एका कार्यक्रमात माजी आमदार पप्पू कालानी हेच सिमेंट काँक्रीटच्या रस्त्यांचे प्रणेते असल्याची जाहीर पोचपावती दिली आहे.ऐन लोकसभा निवडणुकीच्या पार्श्वभूमीवर डॉ.शिंदे यांनी पप्पू कालानी यांच्या कामाचे गुणगान केल्यामुळे डॉ.शिंदे यांच्या जिंदादिलीचा मोठेपणा समोर आला असून यानिमित्ताने पप्पू कालानी यांनी त्यांच्या कार्यकाळात केलेल्या विकासकामांची नव्याने चर्चा शहरवाशी करू लागले आहेत.

रामनवमी निमित्ताने आयोजित करण्यात आलेल्या जाहीर कार्यक्रमातील हा प्रसंग असून डॉ.शिंदे यांनी यावेळी पप्पू कालानी यांचे केलेले कौतुक मासमीडियावर व्हायरल झालेले आहे.कालानी यांनीच प्रथम सिमेंट काँक्रीटच्या रस्त्यांची सुरवात केली आहे.कालानी यांनी रचलेल्या याच पायंड्याचा कित्ता नंतर इतर शहरांनी गिरवला आहे.त्यामुळेच बहुतांश शहरात सिमेंट काँक्रीटचे रस्ते दिसू लागले असून कल्याण लोकसभा मतदार संघात देखील सर्वत्र काँक्रीटीकरणाच्या रस्त्यांचे काम सुरू असल्याची पोचपावती डॉ.श्रीकांत शिंदे यांनी पप्पू कालानी यांना दिली.

डॉ.शिंदे यांच्या या जिंदादिलीच्या मोठेपणामुळे पप्पू कालानी यांनी त्यांच्या कालावधीत केलेली विकास कामे पुन्हा नागरिकांसाठी चर्चेचा विषय बनला आहे.1986 साली नगरसेवक नगराध्यक्ष व 1989 मध्ये नगराध्यक्ष असताना पप्पू कालानी यांनी शहरात 104 सिमेंट काँक्रीटच्या रिंगरूटचे जाळे पसरवले.यातील बहुतांश रस्ते हे आजही ठणठणीत आहेत.2014 मध्ये ज्योती कालानी ह्या राष्ट्रवादीच्या वतीने आमदारकीच्या निवडणुकीसाठी उभ्या होत्या.तेंव्हा उल्हासनगरात आलेले शरद पवार,गणेश नाईक यांनी देखील पप्पू कालानी यांनी काँक्रीटच्या रस्त्यांची सुरवात केल्यावर इतर शहरांनी याच रस्त्याची प्रेरणा घेतल्याची कबुली दिली होती.