'देशात युद्धासारखी स्थिती...' संजय राऊतांनी केली मोठी मागणी

मुंबई: महाराष्ट्रासह देशाच्या अन्य भागात कोरोना रुग्णांची संख्या झपाट्याने वाढत आहे. वाढत्या रुग्णसंख्येमुळे आरोग्य व्यवस्थेवर प्रचंड ताण आला आहे. रुग्ण संख्या अशीच वाढत राहिली, तर आरोग्य व्यवस्था कोलमडून पडू शकते. देशाच्या अनेक भागातून बेड्स, ऑक्सिजन, वेंटिलेटर्स अभावी रुग्ण नाहक प्राणांना मुकल्याच्या बातम्या येत आहेत.

महाराष्ट्रच नाही, तर देशभरातून ऑक्सिजनला मोठी मागणी आहे. कोरोनाची ही लाट थोपवण्यासाठी केलेल्या वेगवेगळया उपायोजना तोकडया पडत आहेत. या परिस्थितीच्या पार्श्वभूमीवर शिवसेनेचे राज्यसभेतील खासदार आणि प्रवक्ते संजय राऊत यांनी एक टि्वट केले आहे.

"देशात एक अभूतपूर्व आणि युद्धासारखी स्थिती निर्माण झालीय. सर्वत्र संभ्रम आणि चिंता आहे. बेड्स, ऑक्सिजन आणि लसी सुद्धा उपलब्ध नाहीयत. फक्त सर्वत्र एकच गोंधळ आहे. या परिस्थितीत एकूणच कोरोनाच्या स्थितीवर चर्चा करण्यासाठी संसदेचे दोन दिवसांचे विशेष अधिवेशन बोलवावे" अशी मागणी संजय राऊत यांनी केली आहे.

महाराष्ट्रात काय स्थिती आहे?

महाराष्ट्रातील कोरोनाबाधित रुग्णांच्या संख्येत झपाट्याने वाढ होताना दिसत आहे. गेल्या 24 तासांत राज्यात 68 हजार 631 नव्या कोरोनाबाधित रुग्णांची नोंद झाली आहे, तर 45 हजार 654 कोरोना रुग्णांनी विषाणूवर मात केली आहे. चिंता वाढवणारी माहिती म्हणजे दिवसभरातील मृत्यांच्या संख्येने पाचशेचा आकडा पार केला आहे. गेल्या 24 तासांत राज्यात 503 रुग्णांना कोरोना विषाणूमुळे मृत्यू झाला आहे. कोरोना महामारीची सुरुवात झाल्यापासून आतापर्यंत राज्यात 60 हजार 473 रुग्णांच्या मृत्यूची नोंद झाली आहे. आतापर्यंत राज्यात 31 लाख 06 हजार 828 रुग्णांनी कोरोनावर मात केली असून त्यांना घरी सोडण्यात आलं आहे. राज्यात सध्या कोरोनाचे 6 लाख 70 हजार 388 सक्रिय रुग्ण आहेत.