कंगना राणावतचं ट्विटर अकाऊंट बंद करण्याला राज्य सरकारचा विरोध

मुंबईः अभिनेत्री कंगना राणावतचे ट्विटर अकाऊंट बंद करण्याला राज्य सरकारने सोमवारी पुन्हा मुंबई उच्च न्यायालयात विरोध केला. व्यक्तिगत भावना दुखावल्या म्हणून अकाऊंट बंद करा अशी याचिका दाखल होऊ शकत नाही, असा युक्तिवाद सरकारकडून करण्यात आला.

वकील अली काशीफ खान देशमुख यांनी कंगनाचे ट्विटर अकाऊंट बंद करावे या मागणीसाठी न्यायालयात याचिका केली आहे. मात्र व्यक्तीगत कारणासाठी अशी मागणी करणे अप्रस्तुत आहे, असा युक्तिवाद सरकारकडून करण्यात आला. तसेच याचिकादाराने जनहित याचिका केली तर यावर खुलासा करु असेही सरकारकडून सांगण्यात आले. 

मुंबई विभागातल्या ताज्या बातम्या वाचण्यासाठी येथे क्लिक करा.

ज्याप्रमाणे याचिकादाराचे मूलभूत अधिकार आहेत. त्याप्रमाणे अन्य व्यक्तींनाही विचार मांडण्याचा अधिकार आहे. त्यामुळे याचिकेवर पुन्हा विचार करा असे मत खंडपीठाने व्यक्त केले. याचिकेवर पुढील सुनावणी 7 जानेवारीला आहे. कंगना ट्विटद्वारे धार्मिक द्वेष निर्माण करीत आहे, असा आरोप याचिकेत केला आहे.

हेही वाचा- लसीकरणासाठी मुंबईतली 8 केंद्रे निश्चित, 40 डॉक्टरांचे होणार विशेष प्रशिक्षण

------------------------

(संपादन- पूजा विचारे)

State government oppose close Kangana Ranaut Twitter account bombay high court