बनावट स्वाक्षऱ्या करून ट्रस्टवर ताबा

मुंबई : मृत महिलेच्या बनावट स्वाक्षऱ्या करून ट्रस्टवर ताबा मिळवल्याच्या आरोपाखाली पोलिसांच्या आर्थिक गुन्हे शाखेने एका राजकीय पक्षाच्या पदाधिकाऱ्याला अटक केली. या प्रकरणात सव्वातीन कोटी रुपयांची फसवणूक झाल्याची माहिती पोलिस अधिकाऱ्यांनी दिली.

हे वाचलेय का... भारतात सर्वाधिक आंबट शौकीन..

बनावट स्वाक्षऱ्या प्रकरणात भांडुप पोलिसांनी अशोककुमार चंद्रपाल सिंग (52) याच्याविरोधात भारतीय दंड विधानातील कलम क्र. 420, 465, 467, 468, 471 व 120 (ब) अंतर्गत भांडुप पोलिस ठाण्यात गुन्हा दाखल केला होता. तक्रारदाराच्या दिवंगत आई मार्गारेट मेरी यांनी भांडुप व्हिलेज सिटिझन एज्युकेशन सोसायटी ही धर्मादाय संस्था स्थापन करून इंग्रजी शाळा सुरू केली होती. त्यानंतर तक्रारदाराचे वडील व भावाचे निधन झाले. त्या वेळी चेन्नईला वास्तव्य असलेल्या तक्रारदाराने या संस्थेचा ताबा हंगामी स्वरूपात अशोककुमार सिंग याला दिला. त्यानंतर सिंग याने धर्मादाय कार्यालयाला बनावट कागदपत्रे सादर करून स्वतःसह कुटुंबीयांनाही संबंधित संस्थेचे विश्‍वस्त घोषित केले, असे तक्रारीत म्हटले आहे.

महत्वाचे थर्टीफस्र्टला पिणाऱ्यांना पोलिसांनी केले असे काही!

याप्रकरणी 2016 मध्ये भांडुप पोलिस ठाण्यात दाखल झालेला गुन्हा पुढील तपासासाठी आर्थिक गुन्हे शाखेकडे वर्ग करण्यात आला. तपासादरम्यान पोलिसांनी धर्मादाय आयुक्त कार्यालयाला सादर करण्यात आलेली कागदपत्रे व बॅंकेतील मूळ कागदपत्रांची तपासणी केली. सिंग यांच्या कार्यालयातून जप्त करण्यात आलेल्या कागदपत्रांची पडताळणी केली असता मार्गारेट मेरी यांच्या सचिव म्हणून बनावट स्वाक्षऱ्या करून संस्थेवर ताबा मिळवण्यात आल्याचे निष्पन्न झाले. त्यानंतर गुरुवारी (ता. 2) आर्थिक गुन्हे शाखेने सिंग याला अटक केली.

धक्कादायक नावालाच...स्मार्ट सिटी! वीजचोरीत आघाडीवर आहे हे शहर

राजकीय पक्षाचा पदाधिकारी 
पोलिसांनी अटक केलेला अशोककुमार सिंग उत्तर-पूर्व मुंबईतील एका राजकीय पक्षाचा पदाधिकारी असल्याचे सूत्रांनी सांगितले. त्याने निवडणूक लढवली होती, असेही सांगण्यात आले.