Mumbai News : ठाकरे गटाचे नेता सुधीर मोरे आत्महत्या प्रकरणी वकील महिलेनं छळ केल्याचा मुलाचा आरोप

मुंबई : शिवसेना ठाकरे गटाचे नेते सुधीर सयाजी मोरे यांनी गुरूवारी घाटकोपर आणि विद्याविहारदरम्यान रेल्वेसमोर उडी मारून आत्महत्या केली होती. याप्रकरणी कुर्ला रेल्वे पोलिसांकडून गुन्हा दाखल करण्यात आला . सुधीर मोरे आत्महत्या प्रकरणी वकील महिला नीलिमा चव्हाण यांनी सुधीर मोरे यांचा छळ केल्याचा आरोप त्यांच्या मुलाने केला आहे.

31 ऑगस्ट गुरूवारी रात्री सुधीर मोरे यांचा मृतदेह घाटकोपर येथील रेल्वे रूळावर आढळला होता. गुरूवारी वैयक्तिक कामासाठी बाहेर चाललो, असं मोरे यांनी आपल्याखासगी सुरक्षारक्षकाला सांगितलं होतं. तसेच, गाडी न घेता मोरे यांनी रिक्षाने प्रवास केला. त्यानंतर घाटकोपर आणि विद्याविहार दरम्यान रेल्वेखाली उडी घेऊन मोरे यांनी आत्महत्या केली होती.

अशात सुधीर मोरे यांचा छळ केल्याप्रकरणी मुलाने नीलिमा चव्हाण यांच्यावर कुर्ला रेल्वे पोलीस ठाण्यात गुन्हा दाखल केला आहे. यानंतर रेल्वे पोलीस नीलिमा चव्हाण यांच्या विक्रोळीतील घरी तपासणी केली. पण नीलिमा चव्हाण यांनी घर बदललं असल्याचं समोर आलं आहे.

तपासात पोलिसांनी घाटकोपर स्टेशनवरील सीसीटीव्ही कॅमेरे तपासले. त्यात मृत्यूपूर्वी मोरे कोणाशी तरी फोनवर बोलत असल्याचं समोर आले आहे. तसेच, नीलिमा चव्हाण यांना चौकशीसाठी बोलावणार असल्याची माहिती मिळत आहे.