Vasai News : वसईत बंद घरात कुजलेले तीन मृतदेह सापडले; गॅस गळतीने मृत्यू झाल्याचा प्राथमिक अंदाज

नालासोपारा - वसईत बंद घरात तिघांचा कुजलेल्या अवस्थेत मृतदेह आढळल्याने एकाच खळबळ उडाली आहे. माणिकपूर पोलिसांनी घटनास्थळावरीन तिन्ही मृतदेह ताब्यात घेऊन शवविच्छेदन साठी पाठविले आहेत. वसईच्या नवपाडा परिसरात आज रविवार ता 04 रोजी सायंकाळी 5 च्या सुमारास ही घटना उघड झाली आहे. घरातील गॅस गळतीमुळे ही घटना घडली असल्याचा पोलिसांनी प्राथमिक अंदाज वर्तविला आहे. मात्र खरी घटना काय याचा तपास माणिकपूर पोलीस करीत आहेत.

आजम, राजू, छोटकू अशी प्राथमिक नाव मयताची समोर आली असून, हे तिघेही वसईच्या आनंद नगर परिसरात फळविक्री करत असल्याचे सांगण्यात येत आहे. वसई पश्चिमेच्या नवपाडा परिसरातील आशा चाळ येथे दुस-या मजल्यावरील घरातून सकाळपासून उग्रवास येत असल्याने तेथील रहिवाशांनी आज दुपारी माणिकपूर पोलिसांना तक्रार केली होती.

पोलिसांनी घटनास्थळावर जाऊन पाहणी केली असता, घरातून प्रचंड प्रमाणात दुर्गंधी येत होती. दार बंद असल्याने शेवटी पोलिसांनी खिडक्यांच्या काचा फोडून, आत मध्ये प्रवेश केला असता तीन मृतदेह कुजलेल्या अवस्थेत आढळून आले आहेत. मृतदेहाच्या शरीरावर कोणत्याही जखमा नव्हत्या. घरात गॅसचा उग्र वास ही येत होता.

प्राथमिक अंदाजानुसार या घरामध्ये गॅस चालू राहिला असावा, आणि या बंद घरात ऑक्सिजनची कमतरता भासल्यामुळे त्यांचा मृत्यू झाल्याचा अंदाज व्यक्त करण्यात येत आहे. माञ शवविच्छेदन अहवालानंतरच मयताच नक्की कारण कळेल. सध्या पोलिसांनी मृतदेह शवविच्छदनासाठी रुग्णालयात पाठवला आहे. उशिरापर्यंत तरी मयतांचे कुणी नातेवाईक समोर आले नाही.