पेणमध्ये 'कोरोना' रुग्णसंख्येचा वेगाने प्रसार

वडखळ : पेण तालुक्यात आठ ते १० दिवसांपूर्वी एकही कोरोनाबाधित रुग्ण नव्हता, परंतु आता तालुक्यात या आजाराचा संसर्ग झपाट्याने होत आहे. आतापर्यंत तालुक्यात १२ हजार ७७३ नागरिकांना कोरोना झाला; तर ११,८६५ नागरिक यामधून मुक्त झाले. सध्या दररोज शेकडो नागरिकांना संसर्ग होत आहे. एकीकडे कोरोनासंदर्भात नियमांचे पालन व्हावे यासाठी सरकारी निर्बंध लावत आहे; तर दुसरीकडे राजकीय मंडळी शेकडोने कार्यकर्ते जमवून आपल्या पक्षाची ताकद वाढवताना दिसत आहेत.(Rapid spread of corona outbreak in Pen)

त्यातच काही सुज्ञ संघटनाही कोरोनाचे नियम तोडून कार्यक्रम घेत आहेत. एकंदरीत, पेण तालुक्यात कोरोना संसर्ग झपाट्याने वाढत आहे. येत्या आठ दिवसांत पेण तालुक्यात योग्य ती खबरदारी घेतली नाही तर कोरोना संसर्गाचा विस्फोट झाल्याशिवाय राहणार नाही असे जाणकार सांगतात. सध्या दररोज १५० पेक्षा अधिक नवीन रुग्ण सापडत आहेत. पेण शहरात तर विनामास्क फिरणाऱ्यांची संख्या मोठी आहे. त्यामुळे कारवाई करणे गरजेचे आहे; अन्यथा आरोग्याची स्थिती हाताबाहेर गेल्याशिवाय राहणार नाही. चाचण्या युद्धपातळीवर पेणमध्ये वाढलेला संसर्ग पाहता पेण तालुका आरोग्य अधिकारी अर्पणा खेडेकर यांनी सरकारी कार्यालय तसेच पेण तालुक्याच्या प्रवेशद्वारावर आशाताईंच्या मदतीने कोविड चाचण्या सुरू केल्या आहेत.(Pen corona update)

तालुक्यात मागील १५ दिवसांपूर्वी एकही कोरोना संसर्ग व्यक्ती नव्हती, परंतु गेल्या आठवडाभरात कोरोनाचा प्रसार झपाट्याने होत असल्याने सुरक्षतेच्या दृष्टीने पेण तहसील कार्यालय, पेण प्रांत कार्यालय, पंचायत समिती कार्यालय, या ठिकाणी चाचण्या करण्यात येत आहेत. तालुक्याचे प्रवेशद्वार समजल्या जाणाऱ्या खारपाडा पुलावरही चाचणी केली जात आहे. पेण तालुक्यातील सरकारी कार्यालयांत कोरोना चाचणी करण्यात येत आहे; तर महामार्गावर खारपाडा येथे कोरोना चाचणी केंद्र आहे. पेण उपजिल्हा रुग्णालय, प्राथमिक आरोग्य केंद्र येथे लसीकरण सुरू आहे; तर गावातील नागरिकांनी मागणी केल्यास त्या गावात आरोग्य कर्मचारी लसीकरण करत आहेत. आतापर्यंत १५ ते १८ वयोगटातील पाच हजार १६३ मुलांचे लसीकरण करण्यात आले आहे. नागरिकानी लसीकरण करून घ्यावे. कोरोना प्रतिबंधक नियमांचे पालन करावे.

- अर्पणा खेडेकर , पेण तालुका आरोग्य अधिकारी