दादरच्या दर्शन गॅलरीला रमाबाई आंबेडकरांचे नाव

मुंबई, ता. १३ : दादर चौपाटीवर बांधण्यात आलेल्या दर्शन गॅलरीच्या नामकरणावर शिक्कामोर्तब झाले आहे. ‘माता रमाबाई आंबेडकर स्मृती व्ह्युईंग डेक’ असे नाव गॅलरीला दिले जाणार आहे. तशी सूचना शिवसेनेकडून मांडण्यात आली आहे.

दादरमधील जुन्या पर्जन्यवाहिनीच्या पातमुखावर दर्शन गॅलरी बांधण्यात आली आहे. उद्‍घाटनप्रसंगी गॅलरीला माता रमाबाई आंबेडकर यांचे नाव द्यावे, असे निर्देश उपनगरचे पालकमंत्री आदित्य ठाकरे यांनी दिले होते. त्यानंतर तत्काळ शिवसेनेने त्याबाबतची प्रक्रिया सुरू केली आहे. सभागृह नेत्या विशाखा राऊत यांनी नामकरणाबाबत स्थानिक प्रभागाला पत्र दिले आहे. आता पालिकेची कायदेशीर प्रक्रिया पूर्ण झाल्यावर नावावर शिक्कामोर्तब होणार आहे.

प्रभाग समितीच्या मान्यतेनंतर जाहीर कार्यक्रमात अधिकृतपणे गॅलरीचे नामकरण करण्यात येईल, असे विशाखा राऊत यांनी सांगितले. त्या ठिकाणी संबंधित नावाचा फलकही लावण्यात यावा, अशी मागणी नवी मुंबईतील रहिवासी विकास सोरटे यांनी केली.