मुंबईत आतापर्यंत १५ टक्के नालेसफाई | Mumbai News | Sakal
sakal

बोलून बातमी शोधा

drainage line mumbai
मुंबईत आतापर्यंत १५ टक्के नालेसफाई

Mumbai News | मुंबईत आतापर्यंत १५ टक्के नालेसफाई

sakal_logo
By

मुंबई : दिवस वेगाने सरत आहेत, पावसाळाही अगदी दीड महिन्यावर आहे. त्या तुलनेत मुंबईमधील नालेसफाई मात्र संथगतीने सुरू आहे. मुंबईत आतापार्यंत केवळ १५ टक्केच नालेसफाई झाल्याचा दावा विरोधकांनी केला आहे. नालेसफाईचा वेग असाच राहिला, तर पावसाळ्यापूर्वी नालेसफाई पूर्ण होणे अवघड आहे. अशा परिस्थितीत मुंबईची ‘तुंबई’ होण्याची शक्यताच अधिक असल्याची भीती विरोधकांकडून व्यक्त होत आहे.

पावसाळ्याच्या पाच महिने आधीच मुंबईतील नालेसफाईला सुरुवात होत असते. दरवर्षी जानेवारी महिन्यात नालेसफाईची कामे हाती घेतली जातात. त्यामुळे एप्रिल महिन्यापर्यंत ७५ टक्के नालेसफाईची कामे पूर्ण झालेली असतात. या वेळी मात्र नालेसफाईला उशिरा सुरुवात झाली. महापालिकेतील नगरसेवकांचा कार्यकाळ संपल्याने पालिकेवर प्रशासक नेमण्यात आला. यानंतर नालेसफाईच्या कामांसाठी निविदा प्रक्रिया राबवण्यात आली. त्यामुळे प्रत्यक्ष नालेसफाईच्या कामाला उशिरा सुरुवात झाली.

अशा परिस्थितीत जोरात पाऊस झाला तर पाणी साचून पूरपरिस्थिती उद्‍भवण्याची भीती आहे. असे झाले तर यासाठी पालिका प्रशासन जबाबदार असेल, असे पालिकेतील माजी विरोधी पक्षनेते रवी राजा यांनी सांगितले. दरवर्षी नालेसफाईवर नगरसेवकांचे लक्ष असते. या वेळी नगरसेवकांचा कार्यकाळ संपल्याने प्रशासनावर कुणाचाही अंकुश नाही. नालेसफाई वेळेत पूर्ण होण्यासाठी दोन शिफ्टमध्ये नालेसफाई करणार, असे पालिका आयुक्तांनी म्हटले होते; मात्र दुसऱ्या पाळीतील काम होताना दिसत नाही. सध्या पालिका प्रशासनाला काय दावा करायचा तो करू द्या, आम्ही १ जूनला कामाची पाहणी करून काय ते उत्तर देऊ, असेही रवी राजा यांनी म्हटले आहे.

नालेसफाई नव्हे ‘हात की सफाई’!

पालिका प्रशासन काहीही दावा करत असले, तरी मुंबईतील नालेसफाई म्हणजे ‘हात की सफाई’ असल्याची टीका भाजपचे माजी गटनेते प्रभाकर शिंदे यांनी सांगितले. आतापार्यंत १० टक्केदेखील नालेसफाई झालेली नाही. त्यामुळे यंदा पावसाळ्यात मुंबईकरांना नाहक त्रास सहन करावा लागू शकतो. आमचे नालेसफाईच्या कामावर बारीक लक्ष असून वेळेत पोलखोल करणार असल्याचेही शिंदे म्हणाले.

मुंबईत उशिरा नालेसफाई सुरू झाल्यामुळे सध्या केवळ १० ते १५ टक्केच काम झाले आहे. असे असताना पालिका आयुक्त ३१ मेपर्यंत ७५ टक्के काम पूर्ण करणार असल्याचा दावा करत आहेत. केवळ ४५ दिवसांत पूर्ण नालेसफाई करणे कसे शक्य आहे, त्यामुळे मुंबईकरांना यंदाही तुंबईचा सामना करावा लागणार आहे. यासाठी बेजबाबदार असलेले पालिका प्रशासन जबाबदार असल्याचे त्यांनी म्हटले आहे.

- रवी राजा, माजी विरोधी पक्षनेते, मुंबई पालिका

Web Title: Todays Latest Marathi News

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top