जंतनाशक गोळी वाटप सप्ताह आजपासून

मुंबई, ता. २४ :  राष्ट्रीय जंतनाशक कार्यक्रमांतर्गत राष्ट्रीय जंतनाशक दिन मोहिमेच्या निमित्ताने आजपासून २ मेपर्यंत सप्ताह साजरा करण्यात येणार आहे. यानिमित्त १ ते १९ वर्षे वयोगटातील मुला-मुलींना जंतनाशक गोळ्यांचे वाटप करण्यात येणार आहे. मुला-मुलींचे आरोग्य चांगले ठेवणे, पोषण स्थिती, शिक्षण व जीवनाचा दर्जा उंचावणे, हे या कार्यक्रमाचे उद्दिष्ट असल्याचे पालिका आरोग्य विभागकडून सांगण्यात आले.
या मोहिमेतंर्गत महापालिका आरोग्य केंद्र, अंगणवाडी, शाळा व महाविद्यालयात जाणाऱ्या मुला-मुलींना गोळी देण्यात येणार आहे. यासाठी सहायक प्रसविका, आरोग्यसेविका, आशा, अंगणवाडी कार्यकर्ते व शिक्षकांची मदत घेण्यात येणार आहे. या मोहिमेसाठी सहकार्य करण्याचे आवाहन महापालिकेच्या कार्यकारी आरोग्य अधिकारी डॉ. मंगला गोमारे यांनी केले आहे.