रायगड : पाण्याच्या टाकीत पडल्याने अडीच वर्षीय मुलाचा मृत्यू

महाड : येथील औद्योगिक क्षेत्रातील (Mahad MIDC) नांगलवाडी येथे पाण्याच्या टाकीत पडल्याने (child death) एका अडीच वर्षीय मुलाचा मृत्यू झाला. मृत मुलगा रत्नागिरी जिल्ह्यातील (Ratnagiri) खेड तालुक्यातील रहिवासी असून तो लग्न ठरवण्याच्या कार्यक्रमासाठी आपल्या वडिलांसोबत आला होता. ही घटना रविवारी दुपारी साडेतीन वाजता घडली.

खेड तालुक्यातील हेदली येथील सुधीर झुजम हे आपल्या कुटुंबासह महाडजवळील नांगलवाडी येथे लग्न ठरवण्याच्या कार्यक्रमासाठी आले होते. मनोहर महाडिक यांच्या घरी हा कार्यक्रम पार पडला. यानंतर जेवण आटोपल्यानंतर हे सर्व जण घरी परतण्यासाठी जात असताना त्यांचा मुलगा श्रेयांश कुठेही न दिसल्याने त्याचा शोध सर्वांनी सुरू केला. या वेळी श्रेयांश हा मनोहर महाडिक यांच्या घराच्या मागील जागेत असलेल्या पाण्याच्या टाकीत पडलेला आढळला. त्याला तातडीने महाडच्या ग्रामीण रुग्णालयात दाखल करण्यात आले; परंतु तत्पूर्वी तो मृत झाल्याचे डॉक्टरांकडून घोषित करण्यात आले. या घटनेची नोंद महाड औद्योगिक पोलिस ठाण्यांमध्ये करण्यात आली.