ठाणे ग्रामीणमध्ये एक लाख २० हजार बालकांना पोलिओ डोस

ठाणे : ठाणे जिल्ह्यातील ग्रामीण भागात राष्ट्रीय पल्स पोलिओ लसीकरण (Pulse polio vaccination) मोहिमेअंतर्गत पाच वर्षांपर्यंतच्या एक लाख २० हजार ७५२ बालकांना पोलिओ डोस (Polio dose) देण्यात आला. त्यामुळे जिल्ह्यात रविवारी सुमारे ८९ टक्के पोलिओ लसीकरण झाले असल्याची माहिती जिल्हा आरोग्य अधिकारी डॉ. गंगाधर परगे (Dr gangadhar Parage) यांनी दिली. जिल्हास्तरीय पोलिओ लसीकरण मोहिमेचा शुभारंभ प्राथमिक आरोग्य केंद्र सोनावला अंतर्गत येणाऱ्या उपकेंद्र सागाव येथे जिल्हा परिषद अध्यक्ष पुष्पा पाटील (Pushpa Patil) यांच्या उपस्थितीत शहापूरमध्ये जिल्हा परिषदेचे उपाध्यक्ष सुभाष पवार यांच्या हस्ते झाले. त्यानंतर जिल्ह्यात सुमारे १८३१ बुथच्या माध्यमातून ही मोहीम राबविण्यात आली.

जिल्ह्यात पोलिओ डोससाठी अपेक्षित लाभार्थी बालकांची संख्या १ लाख ३७ हजार १२० एवढी आहे. त्यापैकी आज १ लाख २० हजार ७५२ बालकांना डोस पाजण्यात आला. उर्वरित बालकांना पुढील तीन ते पाच दिवसांमध्ये आरोग्य कर्मचारी घरोघरी जाऊन पोलिओचे डोस देणार असल्याचे जिल्हा लसीकरण अधिकारी डॉ. अंजली चौधरी यांनी सांगितले.