नालासोपाऱ्यात ४ सराईत गुन्हेगार अटक ; ४ गुन्हे उघड

नालासोपाऱ्यात चार सराईत गुन्हेगार अटक नालासोपारा, ता. ४ (बातमीदार) : वसई, विरार, नालासोपारा परिसरात चोरी करून फरार होणाऱ्या ४ सराईत गुन्हेगारांना अटक करण्यात पेल्हार पोलिसांना यश आले आहे. या गुन्हेगारांनी ४ गुन्हे केल्याचे काबूलही केले आहे. लतीफ शेख, तजमुल हुसेन, शहाआलम चौधरी, शाहिल शहा अशी अटक आरोपींची नावे आहेत. २२ ते २३ डिसेंबर या कालावधीत लतीफ आणि तजमुल या दोघांनी वसई फाटा येथील भानोबा एंटरप्रायझेसच्या मालकीच्या कंटेनरमधील दोन बॅटरी चोरी केली होती; तर शहा आलम आणि शाहिल या दोघांनी दुकानाचे शटर तोडून कामगारांना मारहाण करत दुकानातील सामानाची चोरी केली होती. या दोन्ही घटनांप्रकरणी पेल्हार पोलिस ठाण्यात गुन्हा दाखल झाला होता. त्यानुसार तपास करत पोलिसांनी या चौघांन बेड्या ठोकल्या आहेत.