ऑनलाईन परीक्षेसाठी धारावीत विद्यार्थ्यांचा मोर्चा

ऑनलाईन परीक्षेसाठी धारावीत विद्यार्थ्यांचा मोर्चा धारावी (बातमीदार) : दहावी-बारावीच्या परीक्षा ऑफलाईन न घेता ऑनलाईन घ्यावी, या मागणीसाठी सोमवारी धारावीतील संत रोहिदास मार्गावरील गोल्ड फिल्ड सोसायटीच्या मुख्य प्रवेशद्वारावर विद्यार्थ्यांनी मोर्चा काढला. शालेय शिक्षणमंत्री व धारावीच्या आमदार वर्षा गायकवाड यांचे एक निवासस्थान गोल्ड फिल्ड सोसायटीत असल्याने हा मोर्चा इमारतीसमोर धडकला. प्रसिद्ध यू-ट्युबर विकास फाटक ऊर्फ हिंदुस्थानी भाऊ याच्या नेतृत्वाखाली हा मोर्चा काढण्यात आला. सकाळी अचानक अकरा वाजल्यापासून दहावी-बारावीचे विद्यार्थी या ठिकाणी जमू लागले. मंत्री गायकवाड धारावीत नसल्याने त्यांची भेट घेणे आंदोलकांना शक्य झाले नाही. तणाव वाढू नये, यासाठी पोलिस प्रयत्न करत होते; परंतु विद्यार्थी आक्रमक झाल्याने पोलिसांनी लाठीमार सुरू केला. विद्यार्थ्यांना पांगवल्यावर पोलिसांनी शीव स्थानकासमोरील धारावीकडे जाणारा संत रोहिदास मार्ग रोखून बंद केला होता.