‘हिंदुस्थानी भाऊ’वर गुन्हा दाखल करण्याची प्रक्रिया सुरू

‘हिंदुस्थानी भाऊ’वर गुन्हा दाखल करण्याची प्रक्रिया सुरू मुंबई, ता. ३१ ः सोमवारी राज्यात विविध ठिकाणी झालेल्या आंदोलनाला यू-ट्युबर ‘हिंदुस्थानी भाऊ’ची फूस असल्याची माहिती पोलिसांच्या प्राथमिक तपासात समोर आली. आंदोलनावेळी तो तिथेच उपस्थित होता. त्याने सोशल मीडियावरून सरकारला धमकीही दिल्याचा व्हिडीओ सोशल मीडियावर व्हायरलही झाला. त्याच्यामुळे विद्यार्थी रस्त्यावर उतरल्याचे स्पष्ट झाल्याने पोलिसांकडून त्याच्यावर गुन्हा दाखल करण्याची प्रक्रिया सुरू केली आहे. मुंबईतील अनेक विद्यार्थ्यांनी हिंदुस्थानी भाऊच्या आवाहनानंतर आम्ही आंदोलनात सहभागी झालो असल्याचे सांगितले. काही दिवसांपूर्वी हिंदुस्थानी भाऊने विद्यार्थ्यांच्या मागण्या मान्य केल्या नाही तर वर्षा गायकवाड यांच्या घराबाहेर आंदोलन करू, असा व्हिडीओ पोस्ट केला होता. त्यानंतर त्याच्याच आवाहनानंतर आज विद्यार्थ्यांनी महाराष्ट्रात अनेक ठिकाणी आंदोलन केल्याचे समजते.