रामेश्वर शिव मंदिराचा लवकरच कायापालट

घाटकोपर, ता. २६ (बातमीदार) ः घाटकोपर पूर्वेकडील लक्ष्मीनगर येथे १९८३ साली कामगार नेते दत्ता सामंत यांनी रामेश्वर शिवमंदिराची स्थापना केली. त्या शिवमंदिराचा लवकरच कायापालट होणार आहे.
घाटकोपर तसेच मुंबईतील बहुसंख्य शिवभक्तांचे श्रद्धास्थान असलेल्या या मंदिरात सर्व सण व उत्सव मोठ्या उत्साहात साजरे केले जातात. महाशिवरात्रीला तर भक्तगण मोठ्या संख्येने या मंदिराला भेट देतात. मंदिराच्या नूतनीकरणासाठी विश्वस्तांनी आमदार पराग शाह यांच्याकडे विचारणा केली असता त्यांनी मंदिराच्या जीर्णोद्धाराची सर्व जबाबदारी घेतली आहे. शाह सेवाभावी वृत्तीने काम करत असून या कामामुळे स्थानिक नागरिकांना, तसेच घाटकोपर बाहेरून येणाऱ्या भक्तगणांना विशेष फायदा होईल. हे काम आमदार कोणताही शासकीय निधी न वापरता स्वखर्चाने करत आहेत. महाशिवरात्रीनंतर कामास सुरुवात होणार आहे.