दंत महाविद्यालयातील कोरोना सेंटर बंद

अंबरनाथ, ता. २८ (बातमीदार) ः कोरोना बाधितांवर उपचार करण्यासाठी अंबरनाथ नगरपालिकेने दंत महाविद्यालयाच्या जागेत सुरू केलेले कोरोना सेंटर बंद करण्याचा निर्णय घेतला आहे. सेंटरमधील सर्व साहित्य उपकरणांची आवराआवर हाती घेण्यात आली आहे. मात्र सर्व साहित्य ठेवायचे कुठे आणि कसे, ही समस्या नगरपालिकेसमोर उभी ठाकली आहे.
कोरोनाच्या पहिल्या लाटेत अंबरनाथच्या चिखलोली भागातील बंद असलेल्या दंत महाविद्यालयात कोविड उपचार केंद्र सुरू करण्याचा निर्णय आरोग्य प्रशासनाच्या वतीने घेण्यात आला. कोरोनाच्या दोन्ही लाटेमध्ये या कोव्हिड सेंटरमध्ये रुग्णांवर उपचार करण्यात आले. दरम्यान, आपत्कालीन परिस्थितीत कोविड रुग्णांवर उपचार करण्यासाठी नगरपालिकेने ताब्यात घेतलेले दंत महाविद्यालयाच्या भाडे वसुलीसाठी महाविद्यालयाच्या व्यवस्थापनाने उच्च न्यायालयात दाद मागितली होती. त्यावर न्यायालयाने चार कोटी ५० लाख रुपये भाडे दंत महाविद्यालयाच्या मालकाला देण्याचे आदेश प्रशासनाला नुकतेच दिले आहेत. यासाठी तीन महिन्यांची मुदत पालिका प्रशासनाला दिली आहे. एवढी मोठी रक्कम देणे शक्य नसल्याने निधी मिळावा, अशी मागणी पालिकेने सरकारला केली आहे. अखेर या निर्णयानंतर गुरुवारपासून नगरपालिका प्रशासनाने दंत महाविद्यालयातील बेड्स, खुर्च्या, पंखे, टीव्ही संच, संगणक वातानुकूलित यंत्रे यांसारख्या साहित्याची आणि उपकरणांची मोजदाद करून मिळेल त्या वाहनांतून साहित्य हलवण्यास सुरुवात केली आहे.

अग्निशमन दलाच्या कार्यालयाचा आधार
कोविड सेंटरमधील साहित्य ठेवायचे कुठे, असा पेच नगरपालिकेसमोर आहे. काही साहित्य नगरपालिकेच्या अग्निशमन दलाच्या कार्यालयात, तर काही साहित्य भांडार कार्यालयात ठेवावे लागणार आहे.