मुंबई : मढ जेटी परिसरातील पाणीचिंता मिटली; नवीन जलवाहिनीचे काम सुरु

मुंबई : मार्वे टी जंक्शनपासून आयएनएस हमलामार्गे मढ जेटीपर्यंत (Madh Jetty) जाणाऱ्या नव्या जलवाहिनीच्या (New water pipeline) कामाला नुकताच सुरुवात करण्यात आली. अपुऱ्या पाणीपुरवठ्यामुळे येथील नागरिक हैराण झाले होते. स्थानिक शिवसेना (shivsena) नगरसेविका संगीता सुतार यांनी याबाबत पालिकेकडे (bmc) पाठपुरावा करून नवीन जलवाहिनीस एप्रिल-मेमध्ये मंजुरी मिळवली होती. हे काम प्रत्यक्ष सुरू झाल्याने परिसरातील हजारो नागरिकांची पाणी चिंता मिटणार आहे.

हमलापर्यंत यापूर्वी ९० सेंटिमीटर व्यासाची आणि त्यापुढे मढ जेटीपर्यंत ३० ते ६० सेंटिमीटर व्यासाची जलवाहिनी होती. येथे विविध प्रकल्पांचे भराव पडत गेल्याने ही जलवाहिनी २० फूट खाली गेली. त्यामुळे तिची दुरुस्तीही कठीण होत गेली. गेल्या १५-२० वर्षांत या परिसरातील लोकसंख्येतही वाढ झाली असून, मढच्या हवाईदल वसाहतीतही आठ ते १० हजार कर्मचारी आहेत. या सर्वांना हे पाणी अपुरे पडत असल्याने नवीन जलवाहिनीची मागणी जोर धरत होती. त्यानुसार नवीन जलवाहिनीच्या कामाला मंजुरी मिळाली आहे.

आता हमलापासून हरबादेवी मंदिर-हवाईदल स्थानकापर्यंत ९० सेंटिमीटर व्यासाची जलवाहिनी बसवण्यात येणार आहे. त्यापुढे मढ जेटीपर्यंत तिचा व्यास ६० सेंटिमीटर असेल. मार्वे ते मढ जेटीपर्यंत ही वाहिनी १४ किलोमीटर लांब असेल. त्यासाठी सुमारे २६ कोटी रुपये मंजूर करण्यात आले आहेत. पातवाडी, धोंडीगाव, वानेला तलाव, मढ कोळीवाडा येथील रहिवाशांना या जलवाहिनीचा फायदा होणार आहे. युवासेनेचे पदाधिकारी आदित्य सुतार यांच्या हस्ते नुकताच या कामाचे उद्‌घाटन झाले. यावेळी मच्छीमार नेते किरण कोळी, शाखाप्रमुख संदेश घरत, ज्येष्ठ शिवसेना कार्यकर्ते मोरेश्र्वर कोळी, कृष्णा कोळी, भास्कर निळा आदी उपस्थित होते.