गिरणी कामगारांना घराचा ताबा नाही; आझाद मैदानात करणार धरणे आंदोलन

प्रभादेवी : गिरणी कामगारांना (Mill Workers) मुंबईतच घरे देऊन पुनर्वसन करण्याचा निश्चित कार्यक्रम जाहीर करण्याच्या मागणीकरिता सर्व श्रमिक संघटनेसह गिरणी कामगार व वारसदार गुरुवारी (ता. १०) आझाद मैदान (Azad Maidan) येथे धरणे आंदोलन (strike) करणार आहेत. गिरणी कामगारांना घरे (House for mill workers) देण्याचा कायदा होऊन २० वर्षे झाली. या कालावधीत तुटपुंज्या घरांची लॉटरी काढली गेली. तसेच १५ हजार गिरणी कामगार व वारसांना घरांचे वाटप करण्यात आले.

यातील ५० टक्के गिरणी कामगार व वारसांना घराचा ताबा मिळालेला नाही. हे वास्तव लक्षात घेता अर्ज केलेल्या एक लाख ७० हजार गिरणी कामगार व वारसांचे, घरे देऊन पुनर्वसन करण्यासाठी कार्यक्रम जाहीर करावा, या मागणीकरिता आंदोलन करीत असल्याचे सर्व श्रमिक संघटना गिरणी कामगार विभागाचे अध्यक्ष कॉ. बी. के. आंब्रे यांनी प्रसिद्धीपत्रकाद्वारे कळवले आहे.

कामगारांच्या विविध मागण्या

गिरणी कामगारांचे मुंबईत घरे देऊन पुनर्वसन करा, म्हाडाकडे केलेल्या घरांच्या अर्जाची छाननी करा, घरांच्या सोडतीमधील यशस्वी गिरणी कामगार व वारसदारांना विनाविलंब घरांचा ताबा द्या, अशा मागण्या पत्रकाद्वारे करण्यात आल्या आहेत.