‘त्या’ २० तरुणांचा नोकरीचा मार्ग मोकळा

ठाणे, ता. ३० ः राज्य परीक्षा परिषदेने अखेर पाच महिन्यांनंतर टायपिंग परीक्षेचा निकाल जाहीर केल्यामुळे ठाणे महापालिकेत नोकरी मिळविण्याचा २० बेरोजगारांचा मार्ग मोकळा झाला आहे. या प्रश्नासंदर्भात भाजपचे आमदार निरंजन डावखरे यांनी मार्चमध्ये झालेल्या विधान परिषदेच्या अधिवेशनात लक्ष वेधून लवकरात लवकर निकाल जाहीर करण्याची मागणी केली होती.
महाराष्ट्र राज्य परीक्षा परिषदेतर्फे ऑक्टोबर-नोव्हेंबर २०२१ मध्ये टायपिंग परीक्षा घेण्यात आली होती. या परीक्षेचा साधारणतः: जानेवारीत निकाल जाहीर होतो. मात्र, मार्च उजाडेपर्यंत परीक्षेचा निकालच जाहीर न झाल्यामुळे बेरोजगारांची कोंडी झाली होती. त्याचा तब्बल दोन लाख विद्यार्थ्यांना फटका बसला होता.
कोट..
ठाणे महापालिकेत माझ्यासह काही तरुण वारसा हक्क व अनुकंपा तत्त्वाने नोकरीच्या प्रतीक्षेत आहेत. मात्र, टायपिंग परीक्षेचा निकाल जाहीर न झाल्यामुळे नोकरी देण्याची प्रक्रियाही लांबली होती. आम्हाला शैक्षणिक पात्रता असूनही चतुर्थ श्रेणीत नोकरी मिळण्याची भीती होती. या प्रश्नासंदर्भात आमदार निरंजन डावखरे यांनी आवाज उठविल्यामुळे अखेर निकाल जाहीर होऊन आम्हाला दिलासा मिळाला आहे.
- अन्वेष जयगडकर, परीक्षार्थी.