टेम्पोच्या धडकेत वाहतूक पोलिस जखमी; टेम्पो चालकाविरोधात गुन्हा दाखल

नवी मुंबई : मुंबई-पुणे मार्गावर नेरूळ-उरणफाटा येथे कर्तव्यावर असलेले वाहतूक पोलिस (Traffic Police injured) शकील रमजान जमादार (४९) यांना भरधाव टेम्पोने धडक (Tempo Accident) देऊन पलायन केल्याची घटना रविवारी सायंकाळी घडली. अपघातात जमादार यांचा मणका फ्रॅक्चर होऊन त्यांच्या हाता-पायांना गंभीर दुखापत झाली आहे. त्यांना सीबीडीतील एमजीएम रुग्‍णालयात (MGM hospital) दाखल करण्यात आले आहे. अपघातानंतर सीबीडी पोलिसांनी (cbd police) पळून गेलेल्या आयशर टेम्पो चालकाविरोधात गुन्हा दाखल केला आहे.

अपघातात जखमी झालेले पोलिस शकील जमादार हे सीबीडी वाहतूक शाखेत कार्यरत असून रविवारी त्यांना मुंबई-पुणे लेनवर नेरूळ-उरण फाटा येथील चौकात कर्तव्यावर नेमण्यात आले होते. सायंकाळी ६ वाजण्याच्या सुमारास व्हीआयपी व्यक्तीचे वाहन उरण फाटा येथून सीबीडीच्या दिशेने गेल्यानंतर काही वेळातच जमादार यांना मागून भरधाव आलेल्या टेम्पोने धडक दिली. त्‍यानंतर टेम्पो सीबीडीच्या दिशेने निघून गेला.

जखमी जमादार यांना समोरील पॉँईटवर कर्तव्यावर असलेले पोलिस शिपाई सागर गायकवाड यांनी तत्काळ सीबीडीतील एमजीएम रुग्‍णालयात दाखल केले. जमादार यांच्या मणक्यामध्ये फ्रॅक्चर झाल्याचे, तसेच त्याच्या उजव्या हाताला तसेच दोन्ही गुडघ्यांना दुखापत झाली आहे. सीबीडी पोलिस टेम्पो चालकाचा शोध घेत आहेत.