मिटकरी यांच्याविरोधात निदर्शने

अंबरनाथ : आमदार अमोल मिटकरी यांच्या निषेधार्थ अंबरनाथला अखिल भारतीय ब्राह्मण महासंघाच्या वतीने घोषणाबाजी करून निदर्शने करण्यात आली. आमदार मिटकरी यांनी ब्राह्मण समाज आणि हिंदू विवाह पद्धतीमधील कन्यादान संस्कार पद्धतीवर गलिच्छ शब्दांत टीका केल्याच्या निषेधार्थ निदर्शने केल्याचे आंदोलकांच्या वतीने सांगण्यात आले.

श्रीकांत कर्वे, आप्पा कुलकर्णी, विजय खरे, वृंदा पटवर्धन, पराग वेलणकर आदींच्या उपस्थितीमध्ये वडवली विभागातील ब्राह्मण सभेसमोर आमदार मिटकरी यांच्याविरोधात घोषणाबाजी करण्यात आली. यानंतर शिवाजीनगर पोलिसांना महासंघाच्या वतीने दिलेल्या निवेदनात समाजात तेढ निर्माण करणाऱ्यांवर कारवाई करण्याची मागणी करण्यात आली. यावेळी महिला आणि पुरुष मोठ्या संख्येने उपस्थित होते.