वायशेत अपघातातील तरुणाचा मृत्यू

सकाळ वृत्तसेवा
अलिबाग, ता. ८ : अलिबाग-रेवस मार्गावर बुधवारी (ता. २) दुचाकी व चारचाकी वाहनांमध्ये झालेल्या अपघातात झिराड येथील केतन भगत हा तरुण गंभीर जखमी झाला होता. त्‍याच्यावर पनवेल येथील एमजीएम रुग्णालयात उपचार सुरू असताना रविवारी (ता. ६) रात्री दहाच्या सुमारास त्‍याचा मृत्‍यू झाला.
अपघातानंतर केतनला जिल्हा रुग्णालयात उपचारासाठी दाखल करण्यात आले होते; मात्र गंभीर जखमी झाल्‍याने पुढील उपचारासाठी पनवेल येथील एमजीएम रुग्णालयात दाखल केले होते. उपचाराला प्रतिसाद न मिळाल्याने रविवारी रात्री त्‍याचे निधन झाले. त्याच्या पार्थिवावर सोमवारी (ता. ७) सायंकाळी झिराड येथील स्मशानभूमीत अंत्यसंस्कार करण्यात आले. त्‍याच्या पश्चात आई व एक विवाहित बहीण व इतर नातेवाईक असा परिवार आहे.