वाहनाच्या धडकेत जखमी बैलाला जिवदान

वाहनाच्या धडकेत जखमी बैलाला जीवदान
पाली, ता. १ (वार्ताहर) ः मुंबई-गोवा महामार्गाजवळ वाकण फाट्यावर सोमवारी (ता. ३०) एका बैलाला अज्ञात वाहनाने धडक दिली. यामध्ये बैल जखमी झाला होता. या बैलाला स्थानिकांनी तत्‍काळ उपचारासाठी रुग्णालयात दाखल करून त्‍याला जीवदान दिले.
मागील काही दिवसांपासून येथील महामार्गासह अंतर्गत रस्‍त्‍यावर मोकाट गुरांचा प्रश्न जटिल झाला आहे. नुकतेच सोमवारी (ता. ३०) येथील स्‍थानिक धम्मशील सावंत यांना मुंबई-गोवा महामार्गावर हा बैल जखमी अवस्‍थेत दिसून आला. एका अज्ञात वाहनाने त्‍याला धडक दिली होती. यामध्ये तो मोठ्या प्रमाणावर जखमी झाला होता. त्‍यामुळे त्यांनी लागलीच बैलाचा व्हिडिओ व फोटो काढून समाज माध्यमावर विविध गटात पाठवला. तसेच त्‍याच्या उपचारासाठी अनेक जणांना आवाहन केले. दरम्यान, ही माहिती भाजप प्रदेश सदस्य राजेश मपारा व सुधागड तालुका मराठा समाज अध्यक्ष धनंजय साजेकर यांना समजली. त्‍यामुळे त्‍यांची शिवऋण प्रतिष्ठानची टीम तत्‍काळ घटनास्‍थळी पोहोचली. त्यांनी पशुवैद्यकीय सुधागड यांच्या सहकार्याने बैलाला प्रथमोपचार दिले. त्यानंतर लगेचच जखमी बैलाला पुढील अधिक उपचारासाठी संत तुकाराम महाराज गोशाळा, धामणे पुणे येथे पाठविण्यात आले. या बैलाला गोशाळेत पाठवण्यासाठी ट्रान्सपोर्ट सेवा खर्च राजेश मपारा यांनी दिला. जखमी बैलाला उपचार करण्यासाठी व जीवदान देण्यासाठी शिवऋण प्रतिष्ठानचे सदस्य केतन म्हस्के, किशोर खरीवले, अमर लहाने तसेच या वेळी वाहतूक पोलिस प्रवीण शिर्के व प्राणिमित्र अजित जैन यांचेसुद्धा सहकार्य लाभले.