पावसाळ्यातील आजाराच्या प्रतिबंधासाठी कीटकनाशकांची फवारणी करण्याची मागणी

भिवंडी : भिवंडीमध्ये गेल्या पंधरा दिवसांपासून सुरू असलेल्या मुसळधार पावसामुळे शहरातील अनेक सखल भागात पाणी साचत आहे. काही वेळाने साचलेले पाणी प्रवाहित झाल्यानंतर त्या पाण्याबरोबर आलेली घाण आणि चिखल त्या परिसरात साचलेला राहतो तर काही ठिकाणी परिसरात पसरलेला असतो. अशा वेळी पावसाळ्यात नागरिकांना संसर्गजन्य आजारांपासून संरक्षण मिळावे यासाठी रहिवासी भागात स्वच्छतेची व्यवस्था करण्यासोबतच संसर्गजन्य आजार रोखण्यासाठी कीटकनाशकांची त्वरित फवारणी करण्याची मागणी शहरातील नागरिकांनी महापालिका प्रशासक अनमोल सागर यांच्याकडे लेखी पत्राद्वारे केली आहे.

गेल्या पंधरा दिवसांत झालेल्या मुसळधार पावसामुळे भिवंडीतीळ अनेक ठिकाणी लोकवस्ती आणि रहदारीच्या मार्गावर पाणी साचले होते. मुसळधार पावसामुळे संगम पाडा, म्हाडा कॉलनी, कोंबडपाडा, अजय नगर, शिवाजी चौक, आदर्श पार्क, नजराणा कंपाउंड, घुंगट नगर, शिवाजी नगर, तीन बत्ती भाजी मार्केट, भावे कंपाउंड, पद्मा नगर, दर्गा रोड, आझमी नगर, काकूबाई चाळ, नवी बस्ती, गोपाळ नगर, अशोक नगर, मानसरोवर, कामतघर, भंडारी कंपाउंड, ओसवाल वाडी, फेणा पाडा, आशीर्वाद नगर आणि झोपडपट्टी भागात पाणी साचल्याने नागरिकांना अनेक समस्यांना तोंड द्यावे लागले.

त्यावेळी नाले आणि गटारांमधून कचरा रस्त्याच्या कडेला असलेल्या निवासी भागात जमा झाला. शहरात पसरलेल्या या घाण कचऱ्यामुळे मोठ्या प्रमाणात मच्छरांची पैदास झाली आहे. त्यामुळे शहरात डेंग्यू, मलेरिया, ताप इत्यादी पावसाळी आजारांचा गंभीर धोका निर्माण आहे. या होणाऱ्या संसर्गजन्य आजारांना रोखण्यासाठी महानगरपालिका आरोग्य विभागाने शहरातील लोकवस्तीच्या भागात कीटकनाशकांची फवारणी करणे अत्यंत महत्वाचे आहे.

तसेच महानगरपालिका स्वच्छता कर्मचाऱ्यांच्या पथकाने प्रत्येक निवासी भागात योग्य स्वच्छता करून कीटकनाशकांची फवारणी करणे आवश्यक आहे. पावसाळी आजारांना प्रतिबंध करण्यासाठी शहरातील नागरिकांसाठी वैद्यकीय उपचार सुविधांची देखील सोय करावी, अशी मागणी शहरातील जनहित सामाजिक संस्थेने प्रशासक अनमोल सागर यांच्याकडे लेखी पत्राद्वारे केली आहे.

याबाबत महापालिकेच्या स्वच्छता विभागाशी संपर्क साधला असता स्वच्छता आरोग्य अधिकारी जे.एम. सोनवणे यांनी सांगितले कि, प्रशासकांच्या सूचनेनुसार महानगरपालिका स्वच्छता कर्मचाऱ्यांना निवासी भागात कीटकनाशकांची फवारणी सुरू करण्याच्या सूचना देण्यात आल्या आहेत. साफसफाईच्या कामावर विशेष लक्ष दिले जात आहे.