घोटवडे येथील पूल धोकादायक

घोटवडे येथील पूल धोकादायक
अवजड वाहतुकीमुळे चिंता वाढली; नव्या पुलाचे बांधकाम खोळंबले
पाली, ता. २ (बातमीदार) ः सुधागड तालुक्यातील घोटवडे गावाजवळील अंबा नदीवरील पूल सध्या अत्यंत जीर्ण आणि धोकादायक स्थितीत झाला आहे. या पुलावरून मोठ्या प्रमाणावर अवजड वाहतूक सुरू असल्याने ग्रामस्थांमध्ये चिंता पसरली आहे. पुलाच्या शेजारी नव्या पुलाचे काम सुरू झाले असले तरी ते अद्याप पूर्ण झालेले नाही. त्यामुळे जुन्या पुलावरूनच नागरिकांना जीव मुठीत घेऊन प्रवास करावा लागत आहे.
हा पूल १९९१ रोजी सार्वजनिक बांधकाम विभाग, पाली-सुधागड यांच्यामार्फत बांधण्यात आला होता. सुमारे ४५ मीटर लांब आणि पाच मीटर रुंद असलेल्या या पुलाद्वारे घोटवडे गाव तसेच परिसरातील आदिवासी वाड्या-वस्त्यांशी संपर्क साधला जातो. वाहतुकीच्या दृष्टीने अत्यंत महत्त्व असलेला हा पूल सध्या मोडकळीस आला असून त्यावरून वाहन चालवणे म्हणजे जीव गमावण्याची शक्यता पत्करणे आहे.
नवीन पूल बांधण्याचे काम सुरू असले तरी वेळेवर पाऊस आल्यामुळे ते रखडले आहे. परिणामी, वाहनधारकांना आणि स्थानिकांना जुन्या पुलावरूनच प्रवास करावा लागत आहे. विशेषतः काही राजकीय मंडळी व स्थानिक कंत्राटदार यांच्या अवजड वाहनांची वाहतूक चालू असल्यामुळे पुलावर ताण येत आहे. सामाजिक कार्यकर्ते महेश झोरे यांनी प्रशासनाकडे अवजड वाहनांची वाहतूक तत्काळ थांबवण्याची मागणी केली आहे.
...................
अखेरची घटका
स्थानिकांनी दिलेल्या माहितीनुसार, पूल पूर्णपणे वाकलेला असून केव्हाही कोसळू शकतो. त्याचे संरक्षण कठडे तुटलेले आहेत. त्यामुळे पावसाळ्यात वाहने नदीत कोसळण्याचा धोका वाढला आहे. या स्थितीत, प्रशासनाने त्वरित हस्तक्षेप करून जुन्या पुलावरील वाहतूक मर्यादित करावी आणि नवीन पूल लवकरात लवकर पूर्ण करावा, अशी जोरदार मागणी होत आहे. या गंभीर परिस्थितीमुळे घोटवडे परिसरातील नागरिकांचा संयम सुटू लागला असून कोणीतरी अपघातात जीव गमावण्याची वेळ येण्याआधी प्रशासनाने योग्य ती कारवाई करावी, असे ग्रामस्थांचे स्पष्ट मत आहे.