विद्यार्थ्यांनी गिरवले सर्प विज्ञानाचे धडे

विद्यार्थ्यांनी गिरवले सर्प विज्ञानाचे धडे
सापांबद्दलचे समज व गैरसमज झाले दूर
पाली, ता. ३० (वार्ताहर) ः नागपंचमीनिमित्त सुएसोचे माध्यमिक विद्यालय वांगणी येथे सोमवारी (ता. २८) सर्प विज्ञान कार्यक्रम आयोजित करण्यात आला होता. या वेळी महाराष्ट्र अंधश्रद्धा समिती शाखा पाली-सुधागडच्या वतीने विद्यार्थ्यांना सापांबद्दल असलेले विविध गैरसमज व अंधश्रद्धा दूर करून शास्त्रशुद्ध माहिती देण्यात आली.
साप माणसाला गिळतो का, साप डूक धरतो का, सापाला नागमणी व केस असतात का, पुंगीच्या आवाजाने साप फणा कसा डोलावतो, साप दूध पितो का, साप चावल्यावर कोणती खबरदारी घ्यावी, सापांचे प्रकार कोणते, असे विविध प्रकारचे प्रश्न विद्यार्थ्यांनी उपस्थित केले. पाली-सुधागड महा. अंनिस शाखेचे कार्याध्यक्ष व सर्पमित्र अमित निंबाळकर यांनी या सर्व प्रश्नांचे व शंकांचे शास्त्रशुद्धरित्या निरसन केले. त्यांनी सांगितले की, पूर्ण वाढ झालेल्या मनुष्याचा खांदा रुंद असल्याने साप त्‍याला गिळू शकत नाही. त्यामुळे सापाने मनुष्याला गिळले, या बहुतांश अफवा असतात. सापाच्या अंगावर केस किंवा नागमणी येत नाही. तसेच साप पूर्णतः बहिरा असल्याने गारुड्याने वाजविलेल्या पुंगीचा आवाजदेखील त्याच्यापर्यंत पोहोचत नाही. केवळ पुंगीच्या हालचालींकडे बघून तो आपला फणा डोलवतो. सापाचा मेंदू छोटा असतो. त्यामुळे त्याची स्मरणशक्ती अतिशय अल्प असते. भक्ष पकडणे, संभोग करणे अशा काही प्राथमिक क्रियाच त्याला समजतात, परिणामी साप कोणाचाही डूक धरू शकत नाही. या वेळी विषारी, निमविषारी व बिनविषारी सापांची चित्रे, माहिती व व्हिडिओ टॅबद्वारे दाखवून अधिक सखोल माहिती देण्यात आली. या कार्यक्रमास शाळेचे मुख्याध्यापक महादेव साबळे, अंनिस कार्यकर्ते तुषार ठोंबरे व विद्यार्थी उपस्थित होते. या कार्यक्रमाचे प्रास्ताविक विज्ञान शिक्षक टिळक खाडे व सूत्रसंचालन शिक्षिका संस्कृती घरट यांनी केले.
...............
साप दूध पीत नाही
दूध हे सापाचे अन्न नाही. दूध सापाला पचत नाही, ते त्यांच्यासाठी विषासमान असते. गारुडी सापाला पकडून अन्न-पाण्यावाचून ठेवतात. त्यामुळे दूध समोर नेल्यावर तहाणलेला साप ते पाणी समजून पितो. परिणामी काही दिवसाने या सापाचा मृत्यू होतो, असे सांगितले.