रामराज मार्गाची दुरवस्था

रामराज मार्गाची दुरवस्था
जनसेवा विक्रम मिनीडोअर चालक-मालक संघटनेचे निवेदन
अलिबाग, ता. ५ : अलिबाग ते रोहा या मार्गावरील रामराज परिसरातील रस्त्याची गंभीर दुरवस्था झाली असून गणेशोत्सवापूर्व तातडीने दुरुस्ती करावी, अशी मागणी जनसेवा विक्रम मिनीडोअर चालक-मालक संघटनेने केली आहे. रस्त्यावरील खड्डे, अपूर्ण कामे आणि बांधकाम विभागाच्या दुर्लक्षामुळे प्रवाशांचे हाल होत असून, वेळेवर काम न झाल्यास वंचित बहुजन आघाडीने तीव्र आंदोलन छेडण्याचा इशारा दिला आहे.
रोहा-अलिबाग मार्गाचे हॅम योजनेतून पुन्हा बांधकाम सुरू असून काही भागात काँक्रीटीकरण तर काही भागात डांबरीकरण करण्यात येत आहे; मात्र वावे, रामराज, सुडकोली या ठिकाणी रस्त्याची कामे अर्धवट स्थितीतच आहेत. त्यामुळे वाहनचालक आणि प्रवासी यांना अपघाताचा धोका तसेच प्रवासात अडथळे निर्माण होत आहेत. याशिवाय, काही पूर्ण झालेले रस्तेदेखील निकृष्ट दर्जामुळे उखडले असून मोठमोठे खड्डे पडले आहेत. या समस्येबाबत संघटनेकडून वारंवार बांधकाम विभागाकडे तक्रारी अर्ज करण्यात आले. तरीही सार्वजनिक बांधकाम विभागाचे अभियंता राजीव डोंगरे यांच्याकडून सातत्याने दुर्लक्ष होत असल्याचा आरोप करण्यात आला आहे. यासंदर्भात वंचित बहुजन आघाडीने कुरूळ ते रामराजदरम्यानच्या खड्ड्यांची तातडीने दुरुस्ती करण्याची मागणी केली आहे.
गणपतीपूर्वी रस्त्याची डागडुजी झाली नाही, तर आमच्या संघटनेकडून तीव्र आंदोलन छेडण्यात येईल, असा इशारा वंचित बहुजन आघाडीचे तालुकाध्यक्ष साईनाथ म्हात्रे यांनी दिला आहे.