कायदा व सुव्यवस्था अबाधित ठेवा - विभागीय पोलिस अधिकारी रवींद्र दौंडकर

कायदा व सुव्यवस्था अबाधित ठेवा ः विभागीय पोलिस अधिकारी रवींद्र दौंडकर
आगामी गोपाळकाला उत्सवानिमित्त पाली पोलिस ठाणे येथे शांतता कमिटीची बैठक
सकाळ वृत्तसेवा
पाली, ता. १३ (वार्ताहर) ः आगामी दहीहंडीच्या पार्श्वभूमीवर पाली पोलिस ठाणे येथे रोहा विभागीय पोलिस अधिकारी रवींद्र दौंडकर यांच्या उपस्थितीत सोमवारी (ता. ११) शांतता कमिटीची बैठक झाली. या वेळी रवींद्र दौंडकर यांनी कायदा व सुव्यवस्था अबाधित ठेवण्याचे आवाहन केले.
रवींद्र दौंडकर म्हणाले की, गोविंदा मंडळांना जातीय सलोखा राखून सण साजरा करा. वाहतूक व्यवस्थेत अडथळा येणार नाही याची काळजी घ्यावी. वाहतुकीस अडथळा निर्माण केल्यास कारवाई करण्यात येईल, असा इशारा त्यांनी दिला आहे, तर डीजेचा आवाज ७५ डेसिबलपेक्षा जास्त ठेवू नये, गोविंदांचे विमा काढणे, १४ वर्षांखालील मुलांना गोविंदा पथकात सहभागी न करणे, पथकांनी आपली नावे पोलिस ठाण्यात सादर करणे, फुगे मारताना लहान मुले व महिलांना इजा होणार नाही याची दक्षता घेणे, अशा सूचना देण्यात आल्या आहेत. वाहतूक कोंडी टाळण्यासाठी गोविंदा पथकांनी गाड्या पालीच्याबाहेर पार्क कराव्यात, असेही सांगण्यात आले.
बैठकीत भाजपच्या वतीने दोन लाख २२ हजार २२२ रुपयांची दहीहंडी आणि शिवसेनेच्या वतीने तीन लाख एक हजार १११ रुपयांच्या दहीहंडीबाबत चर्चा झाली. पाली प्रभारी नगराध्यक्ष आरिफ मणियार यांनी वाहतूक व्यवस्थेबाबत पोलिसांना पूर्ण सहकार्य करण्याची हमी दिली, तर सुधागड तालुका समन्वय अध्यक्ष व रायगड शिवसेना उपजिल्हाप्रमुख अनुपम कुलकर्णी यांनी कायदा व सुव्यवस्था पाळून उत्सव आनंदात पार पाडण्याची ग्वाही दिली. बैठकीस पोलिस निरीक्षक हेमलता शेरेकर, रायटर कांबळे, शिवसेनेचे अनुपम कुलकर्णी, भाजपचे आरिफ मणियार आणि दोन्ही पक्षांचे पदाधिकारी व कार्यकर्ते उपस्थित होते.

फोटो ओळ,
पाली ः शांतता कमिटी बैठकीत उपस्थित पोलिस अधिकारी, राजकीय पदाधिकारी व इतर.