पन्नास टक्के शेतकऱ्यांना किसान योजनेचा लाभ

पन्नास टक्के शेतकऱ्यांना किसान योजनेचा लाभ
लाभार्थ्यांमध्ये घट; ई- केवायसी न केल्याने अडचणी
सकाळ वृत्तसेवा
अलिबाग, ता. १३: मोठा गाजावाजा करीत पंतप्रधान किसान सन्मान निधी योजनेचा २० वा हप्ता जेण्याचे जाहिर करण्यात आले; परंतु रायगड जिल्ह्यातील जेमतेम ५० टक्केच शेतकऱ्यांच्या या हप्त्याचे पैसे बॅंक खात्यात जमा झाले. ई- केवायसी अद्यावत न केल्याने या अडचणी येत असल्याचे बोलले जात आहे.
रायगड जिल्ह्यात १ लाखाहून अधिक लाभार्थी आहेत. परंतु २० व्या हप्त्याचे ४७ हजार ४८३ शेतकऱ्यांच्या खात्यात ९ कोटी ४९ लाख ६६ हजार रुपये वर्ग करण्यात आले आहेत. ज्या शेतकऱ्यांच्या खात्यात पैसे जमा का झाले नाहीत त्‍यांनी संबंतिध विभागात चौकशी सुरू केली आहे. यात ई-केवायसी न केल्याने हे पैसे जमा होण्यात अडचणी येत असल्याचे सांगण्यात येत आहे. पैसे न मिळाल्याने सणासुदीच्या उत्साहावर विरजण पडले आहे. मोठ्या अपेक्षेने शेतकरी हप्ताची वाट पहात होते; परंतु ५० टक्क्याहून अधिक शेतकऱ्यांची निराशा झाली आहे.
...............
हप्ता न मिळण्याची कारणे
* ई-केवायसी पूर्ण नसणे
* आधार कार्ड आणि बँक खात्याची जोडणी नसणे
* अर्ज करताना चुकीची माहिती भरणे
* लाभार्थी यादीत नाव नसणे
* जमिनीच्या नोंदीमध्ये त्रुटी
* पात्रता निकष पूर्ण न करणे
----
काय करावे

* पीएम किसानच्या अधिकृत वेबसाइट pmkisan.gov.in ला भेट द्या.
* येथे ''फार्मर्स कॉर्नर'' मध्ये ''बेनिफिशियरी स्टेटस'' किंवा ''नो युवर स्टेटस'' या पर्यायावर क्लिक करा.
* येथे तुमचा नोंदणी क्रमांक किंवा आधार क्रमांक टाकून तुम्ही तुमच्या हप्त्याची स्थिती तपासू शकता. जर हप्ता थांबला असेल, तर त्याचे कारण तिथे दिसेल.
* टोल फ्री क्रमांक: १८००-११५-५२६
* पीएम-किसान हेल्पलाईन: १५५२६१
* लँडलाईन नंबर: ०११-२३३८१०९२ किंवा ०११-२४३००६०६
...........