रायगडातील धरणे ९५ टक्के भरली

रायगडातील धरणे ९५ टक्के भरली
पावसाळी पर्यटनाला उधाण; धबधबे, सांडवे प्रवाहित
पाली, ता. १४ (वार्ताहर) ः मेपासून रायगड जिल्ह्यात पावसाने सुरुवात केली. सतत कोसळणारा अवकाळी पाऊस व त्यानंतर दाखल झालेला मॉन्सून यामुळे जिल्ह्यातील नद्या, तलाव, विहिरी आणि २८ प्रमुख धरणांमध्ये तब्बल ९५.२५ टक्के जलसाठा झाला आहे. त्यामुळे धरण परिसरामध्ये मोठ्या प्रमाणावर पर्यटक पावसाळी पर्यटनाचा आनंद घेण्यासाठी गर्दी करत आहेत.
लघु पाटबंधारे विभागाच्या माहितीनुसार मुरूड, तळा, रोहा, पेण, अलिबाग, सुधागड, श्रीवर्धन, म्हसळा, महाड, कर्जत, खालापूर, पनवेल आणि उरण या तालुक्यांतील बहुतांश धरणांनी १०० टक्के जलसाठा गाठला आहे. सुतारवाडी, पाभरे, संदेरी, खिंडवाडी, कोथुर्डे, खैरे, वरंध, कोंडगाव, उन्हेरे, कवेळे, भिलवले, वावा, फणसाड, घोटवडे, कलोते-मोकाशी, डोणवत, आंबेघर, उसरण, मोरबे, अवसरे, बामणोली, ढोकशेत, कुडकी, साळोख यांसारख्या २४ धरणांमध्ये पाणी शंभर टक्के आहे. श्रीवर्धनमधील कार्ले धरण ९९ टक्के, तर अलिबागमधील श्रीगाव, उरणमधील पुनाडे आणि श्रीवर्धनमधील रानवली धरणे ७५ टक्के भरली आहेत.
..............
पर्यटनाला नवे बळ
धरणे, नद्या आणि तलाव पाण्याने ओसंडून वाहत असल्याने धबधबेही मोठ्या प्रमाणात प्रवाहित झाले आहेत. परिणामी, पावसाळी पर्यटनासाठी रायगड जिल्हा पर्यटकांचे हॉटस्पॉट बनला आहे. धरणांच्या सांडव्यातून ओसंडणाऱ्या पाण्यात मनसोक्त भिजणे, डोंगररांगांतील धबधबे पाहणे, पाणथळ गवताळ भागात फेरफटका मारणे आदीचा मनमुराद आनंद घेण्यासाठी जिल्ह्यासह शेजारच्या जिल्ह्यांतील पर्यटक मोठ्या संख्येने येत आहेत. स्थानिक चहा-कॉर्नर, नाश्त्याच्या टपऱ्या, भेळ-पाणीपुरीवाले, तसेच होमस्टे व्यावसायिकही या गर्दीमुळे सुखावले आहेत.
................
पर्जन्यमानात थोडी घट
मागील वर्षी याच काळात जिल्ह्यातील धरणांमध्ये ९६ टक्के जलसाठा होता. यावर्षी हा आकडा ९५.२५ टक्क्यांवर आहे. जलसंपदा विभागाच्या मते, जुलै महिन्यात पाऊस काहीसा कमी झाल्याने ही किंचित घट झाली आहे, मात्र सध्याचा जलसाठा हंगामाच्या गरजा पूर्ण करण्यासाठी पुरेसा आहे.
...............
शाश्वत पाणीपुरवठ्याची खात्री
सध्याच्या जलसाठ्यामुळे आगामी काही महिने पाणीपुरवठा सुरळीत राहणार आहे. सिंचनासाठीही पुरेसा साठा उपलब्ध असल्याने शेतकरीवर्गाला दिलासा मिळाला आहे. धरणे भरल्याने भूजलपातळी वाढण्याची शक्यताही व्यक्त होत आहे.