मोकाट गुरांमुळे अपघातांचा धोका वाढला

मोकाट गुरांमुळे अपघातांचा धोका वाढला
सुधागड तालुक्यात रस्त्यांवर गुरांचा ठिय्या; प्रवासी व वाहनचालकांची डोकेदुखी
पाली, ता. १८ (वार्ताहर) : सुधागड तालुक्यातील अंतर्गत रस्ते तसेच वाकण-पाली-खोपोली राज्य महामार्गावर मोकाट गुरांचा वावर मोठ्या प्रमाणात वाढला आहे. भररस्त्यावर ठिय्या मांडून बसणाऱ्या या गुरांमुळे वाहतुकीत अडथळा निर्माण होत असून, दुर्दैवाने अनेक जीवघेणे अपघातदेखील घडत आहेत. त्‍यामुळे प्रवासी व वाहनचालकांच्या सुरक्षिततेचा प्रश्न दिवसेंदिवस गंभीर होत चालला आहे.
गुरुवारी (ता. १४) सायंकाळी साडेसहा वाजण्याच्या सुमारास झाप ते वावळोली मार्गावर अशाच मोकाट गुरांच्या कारणामुळे गंभीर अपघात झाला. या दुर्घटनेत जळगाव जिल्ह्यातील अमळनेर येथील संदीप पाटील (रा. शिरसाळे) या दुचाकीस्वाराचा मृत्यू झाला. अचानक समोर आलेल्या गुरांना धडक दिल्याने हा अपघात घडला. अशा घटना वारंवार घडत असल्याने स्थानिक नागरिक आणि वाहनचालकांमध्ये प्रचंड संताप आहे.
भररस्त्यात बसणाऱ्या गुरांमुळे वाहतूक कोंडी हा नेहमीचाच प्रकार झाला आहे. रात्रीच्या वेळी रस्त्यावर पुरेशी प्रकाशयोजना नसल्याने दुचाकीस्वार किंवा इतर वाहनचालकांना रस्त्यावर पडलेली गुरे ओळखता येत नाहीत. परिणामी अपघात होण्याची शक्यता अधिक वाढते. एवढेच नव्हे तर गुरांमध्येच कधी कधी झुंज झाल्याने रस्त्यात गोंधळ निर्माण होतो आणि प्रवाशांच्या जीवाला धोका निर्माण होतो. यामुळे वाहनचालक आणि प्रवासी दोघेही त्रस्त झाले आहेत. अवजड वाहनांच्या धडकेत अनेकदा गुरांचा बळी जातो, तसेच जनावरांना गंभीर दुखापती होतात, मात्र वाहनचालकांनी कितीही हॉर्न वाजविला तरी गुरे जागेवरून हलत नाहीत. त्यामुळे चालकांसमोर जीवघेण्या परिस्थितीला तोंड देण्याचा प्रश्न उभा राहतो.
..................
या पार्श्वभूमीवर मनसे सुधागड तालुकाध्यक्ष सुनील साठे यांनी शासन व प्रशासनाला तातडीने योग्य ती उपाययोजना करण्याची मागणी केली आहे. शेतकऱ्यांनी व गुरे मालकांनी आपली जनावरे मोकाट न सोडता जबाबदारीने सांभाळली पाहिजेत अन्यथा जीवितहानीची मालिका सुरूच राहील, असा इशारा त्यांनी दिला आहे.