१२४ वाहनचालकांना लाखांचा दंड

१२४ वाहनचालकांना लाखांचा दंड
वाहतूक पोलिसांची एकाच दिवशी विशेष मोहीम
पाली, ता. ११ (वार्ताहर)ः रायगड जिल्ह्यात वाहतूक शाखेच्या अधिकाऱ्यांनी आणि पोलिसांनी वाहतुकीचे नियम तोडणाऱ्या वाहनचालकांविरोधात सोमवारी (ता. ८) मोहीम राबवली होती. या वेळी जिल्ह्यातील विविध २८ पोलिस ठाण्यांच्या हद्दीतील १२४ वाहनचालकांवर कायदेशीर कारवाई करताना जिल्हा पोलिसांनी एक लाखांचा दंड वसूल केला आहे.
वाहनचालकांनी नियमभंग करताना केलेल्या गुन्ह्यांमध्ये वेगाने वाहन चालवणे, हेल्मेटशिवाय दुचाकी चालवणे, परवाना नसताना वाहन चालवणे, सिग्नल तोडणे, वाहन कागदपत्रे अपुरी असणे, ओव्हरलोड वाहने, तसेच धोकादायक पद्धतीने वाहन चालवणे अशा विविध बाबींचा समावेश होता. वाहतुकीची शिस्त आणि नागरिकांचा सुरक्षित प्रवास यासाठी पोलिस विभाग अशा मोहिमा राबवत असल्याचे सांगण्यात आले. या वेळी नागरिकांना आवाहन केले आहे की, वाहतूक नियमांचे पालन करणे ही प्रत्येकाची जबाबदारी आहे. अपघात टाळण्यासाठी नियमांचे काटेकोर पालन करावे. नियम मोडणाऱ्यांवर पुढील काळातही अशाच कडक कारवाया सुरू राहणार असल्याचे वाहतूक विभागाने स्पष्ट केले आहे.