६४ शिक्षकांना आज पुरस्कार

६४ शिक्षकांना आज पुरस्कार
निवडणुकांपुर्वी वितरणाची लगीनघाई
सकाळ वृत्तसेवा
अलिबाग, ता.१२ : कर्जत येथे २०२१ मध्ये जिल्हा परिषद बरखास्त झाली. त्यामुळे जिल्हा परिषदेच्या निवडणुकांबरोबर पुरस्कार वितरण समारंभही रखडत गेला. अखेर सोमवार (ता.१३) रोजी जिल्ह्यातील ६४ प्राथमिक विभागातील शिक्षकांना पुरस्कार देऊन गौरवण्यात येणार आहे.
शिक्षक दिनापूर्वी ५ सप्टेंबर रोजी साजऱ्या होणाऱ्या शिक्षक पुरस्कार जाहीर केले जातात. यंदा ईद-ए-मिलाद, दुसऱ्या दिवशी अनंत चतुर्दशी निमित्ताने सुट्टी असल्याने पुरस्कार वितरण समारंभ होणार नसल्याचे स्पष्टीकरण जिल्हा परिषदेच्या शिक्षण विभागाने दिले आहे. पण जिल्हापरिषद निवडणुकांचे बिगुल वाजले आहे. त्यामुळे आचारसंहिता लागण्यापूर्वी पुरस्कार वितरण समारंभाची लगबग सुरु झाली. आरसीएफ कॉलनीतील सभागृहात सोमवारी हा सोहळा पार पडणार आहे. महिला व बाल विकास मंत्री आदिती तटकरे आणि रोजगार हमी मंत्री भरत गोगावले यांच्या उपस्थितीत पुरस्कारांचे वितरण होणार असून तब्बल चार वर्षानंतर हा योग आला आहे.