तीर्थक्षेत्रात भाविकांची मांदियाळी

तीर्थक्षेत्रात भाविकांची मांदियाळी
पालीच्या बल्लाळेश्वराच्या दर्शनाला गर्दी
पाली, ता. २६ (वार्ताहर) ः दिवाळी सुट्ट्यांमध्ये अष्टविनायक तीर्थक्षेत्र पालीत बल्लाळेश्वराच्या दर्शनासाठी भाविकांची मोठी गर्दी होत आहे. शनिवार (ता. २५)पासून पालीत भाविकांची मोठी रेलचेल सुरू झाली आहे. शाळा, महाविद्यालयांना दिवाळीच्या सुट्ट्या आठ ते १० दिवस असल्यामुळे पालीत भाविकांची मोठी वर्दळ आहे. त्यामुळे येथील हॉटेल व्यावसायिक व दुकानदारांचा धंदा तेजीत होता.
बल्लाळेश्वराच्या दर्शनासाठी जिल्ह्यासह महाराष्ट्रभरातून भाविक दाखल होत आहेत. यामुळे येथे चांगली आर्थिक उलाढाल होत असून येथील स्थानिक व्यावसायिक सुखावले आहेत. दिवाळीनिमित्त मंदिराला विद्युत रोषणाई, फुलांची आकर्षक सजावट केली आहे. मंदिर परिसर रांगोळ्यांनी सजला आहे. दिवाळी सुट्ट्यांमुळे मंदिर परिसरातील दुकाने, हॉटेल ग्राहकांनी गजबजले आहेत. लॉजिंग-बोर्डिंगवाल्यांचे आगाऊ बुकिंग झाले आहे. मंदिर परिसराला यात्रेचे स्वरूप आले आहे. बल्लाळेश्वर देवस्थान ट्रस्टच्या वतीने भाविकांच्या सोयीसाठी चोख व्यवस्था करण्यात आली आहे.
----------------------------
वाहतूक पोलिसांची तारांबळ
हॉटेल, खेळण्याची, शोभिवंत वस्तूंची आणि खाऊची दुकाने, नारळ, हार, फुले, पापड व मिरगुंड विक्रेते, सरबतवाले, प्रसाद व पेढेवाले आदींचा धंदा चांगला होत आहे. अनेक भाविक स्वतःची वाहने घेऊन येत आहेत. यामुळे पालीतील रस्त्यावर वाहतूक कोंडी होत आहे. काहीवेळेस नाक्यावर तैनात असलेले वाहतूक पोलिस तसेच पूर्णवेळ बल्लाळेश्वर मंदिर ट्रस्टचे सुरक्षा रक्षक वाहतूक सुरळीत करण्याचा प्रयत्न करीत आहेत.
--------------------------
भाविकांच्या गर्दीचा अंदाज घेऊन योग्य व्यवस्थापन करण्यात आले आहे. बल्लाळेश्वर देवस्थान ट्रस्टच्या वतीने भाविकांसाठी नाममात्र दरात भोजन उपलब्ध आहे. सोयीसुविधांनी परिपूर्ण दोन भक्तनिवास आहेत. त्यामुळे दर्शनासाठी येणाऱ्या भाविकांची कुठल्याही प्रकारची गैरसोय होणार नाही.
- जितेंद्र गद्रे, अध्यक्ष, बल्लाळेश्वर देवस्थान ट्रस्ट, पाली
------------------------
दिवाळी सुट्ट्यांमुळे भाविक दर्शनासाठी गर्दी करीत आहेत. येथे प्रसाद, हार, फुले, नारळ, खेळणी, पापड, लोणचे, विविध वस्तूंची खरेदी करीत आहेत. त्यामुळे सर्वांचा धंदा तेजीत होत आहे. आणखी आठवडाभर चांगला व्यवसाय होईल, अशी आशा आहे.
- मनोज मोरे, दुकानदार