अज्ञानामुळे कुष्ठरोगाचे सावज

अज्ञानामुळे कुष्ठरोगाचे सावज
रायगड जिल्ह्यात १५१ जणांना लागण
सकाळ वृत्तसेवा
अलिबाग, ता. १५ : रायगड जिल्ह्यात १७ नोव्हेंबर ते २ डिसेंबर कालावधीत कुष्ठरोग शोधमोहीम अभियान राबविण्यात आले. या मोहिमेत १५१ नव्या कुष्ठरुग्णांची भर पडली आहे. ग्रामीण भागात आजाराबद्दल असलेल्या अज्ञानामुळे रुग्णसंख्या वाढल्याचे प्रशासनाने मान्य केले आहे.
नव्या रुग्णांसह रायगड जिल्ह्यात उपचार सुरू असलेल्या रुग्णांची एकूण संख्या ४४३ इतकी झाली आहे. ती शून्यावर आणण्यासाठी जिल्हा प्रशासन काम करीत आहे. याच अनुषंगाने राबवलेल्या मोहिमेदरम्यान २३ लाख ८९३ नागरिकांच्या तपासणीचे उद्दिष्ट होते. त्यापैकी ९९ टक्के नागरिकांच्या तपासण्या पूर्ण करण्यात आल्या आहेत. सोमवार (ता. १५)पर्यंत साधारण सहा हजार तपासण्या शिल्लक होत्या. ग्रामीण भागात १०० टक्के, शहरी भागातील जोखीमग्रस्त ३० टक्के लोकसंख्येची तपासणी करण्यात आली. त्यानुसार पाच लाख सहा हजार ८४१ घरांना आशा सेविका व स्वयंसेवक भेटी देत असल्याची माहिती आरोग्यसेवा कुष्ठरोग विभागाच्या सहाय्यक संचालक डॉ. प्राची नेहुळकर यांनी दिली.
----
जनजागृतीवर भर
कुष्ठरुग्ण लवकरात लवकर शोधून त्यांना त्वरित बहुविध औषधोपचाराखाली आणणे, नवीन कुष्ठरुग्ण शोधून बहुविध औषधोपचारा‌द्वारे संसर्गाची साखळी खंडित करून होणारा प्रसार कमी करणे, समाजात कुष्ठरोगाविषयी जनजागृती करणे. २०२७ पर्यंत कुष्ठरोगाचा प्रसार रोखणे, हे ध्येय साध्य करण्याच्या दिशेने वाटचाल करण्यासाठी जिल्हा प्रशासन काम करीत आहे. या मोहिमेला सहकार्य करावे, असे आवाहन करण्यात आले आहे.