सुधागड तालुक्यात गावे झाली पाणीदार

सुधागड तालुक्यात गावे झाली पाणीदार
श्रमदानातून उभारले वनराई बंधारे
पाली, ता. १८ (वार्ताहर) ः सुधागड तालुक्यातील नाडसुर ग्रामपंचायत हद्दीतील धोंडसे, पोटलज खुर्द आणि महागाव परिसरातील ग्रामस्थ, शेठ जे. एन. पालीवाला महाविद्यालयाचे विद्यार्थी-शिक्षक आणि तालुका कृषी विभागाच्या संयुक्त पुढाकारातून वनराई बंधारे उभारण्यात आले आहेत. या बंधाऱ्यांमुळे येथील गावे पाणीदार झाली आहेत.
बंधाऱ्यांच्या उभारणीत दगड, माती आणि रिकाम्या सिमेंटच्या पिशव्या यांचा वापर करून अत्यल्प खर्चात काम पूर्ण केले गेले. धोंडसे गावात रविवारी (ता. १४) उभारण्यात आलेल्या बंधाऱ्याचे काम तालुका कृषी अधिकारी दयावंती कदम यांच्या मार्गदर्शनाखाली पार पडले. या वेळी कृषी अधिकारी डॉ. सर्जेराव पाटील, डॉ. अनिल झेंडे, लीनताज उके, सहाय्यक कृषी अधिकारी कंठाळे, गलांडे, बोराडे, तसेच शेतकरी अविनाश खंडागळे आणि ग्रामस्थांनी सक्रिय सहभाग घेतला, तर शुक्रवारी (ता. १२) पोटलज खुर्द येथेही ग्रामस्थांच्या लोकसहभागातून अशाच स्वरूपाचा बंधारा उभारण्यात आला होता. या वेळी पोटलज खुर्द येथील महिला व पुरुषांनी मोठ्या संख्येने श्रमदान केले, तसेच या वेळी कृषी सेवक बोराडे एस. बी. उपस्थित होते.
...........
पाण्याचा उपयोग
उभारण्यात आलेल्या बंधाऱ्यांमुळे परिसरातील गाई, गुरे, मोकाट जनावरे आणि पक्ष्यांना पाणी उपलब्ध होणार आहे. तसेच शेतकऱ्यांना भाजीपाला व रब्बी हंगामातील पिकांसाठी पाणी मिळण्यास मदत होईल. या बंधाऱ्यांमुळे आजूबाजूच्या विहिरी व बोअरवेल्सची पातळी वाढेल तसेच जमिनीतील ओलावा टिकून राहील. विशेषतः वाल, मूग, मटकी यांसारख्या कडधान्य पिकांच्या उत्पादनात वाढ होण्याची अपेक्षा आहे.