भूत-करणीच्या अफवांना पूर्णविराम

भूत-करणीच्या अफवांना पूर्णविराम
महाडिकवाडीतील नागरिकांची भीती दूर; पोलिस, महाअंनिसच्या प्रबोधनाला यश
पाली, ता. २० (वार्ताहर) ः पेण शहराजवळील महाडिकवाडी गावात गेल्या काही दिवसांपासून भूत, भानामती, करणी व जादूटोणा होत असल्याच्या अफवा पसरवून नागरिकांमध्ये भीतीचे वातावरण निर्माण केले जात होते. या अंधश्रद्धेमुळे गावातील सामाजिक शांतता बिघडण्याची शक्यता निर्माण झाली होती. मात्र वेळेवर हस्तक्षेप करत पेण पोलिस आणि महाराष्ट्र अंधश्रद्धा निर्मूलन समिती (महा. अंनिस) यांच्या संयुक्त प्रयत्नातून गावातील नागरिकांचे प्रबोधन करून ही भीती यशस्वीरीत्या दूर करण्यात आली आहे.
महाडिकवाडी परिसरात जिवंत कोंबडा जमिनीत पुरणे, स्मशानभूमीत नारळ फोडणे, रात्रीच्या वेळी घरात मोठ्या आवाजात मंत्र-तंत्र करणे अशा प्रकारांमुळे ग्रामस्थांमध्ये भीती व संभ्रम निर्माण झाला होता. काही नागरिकांनी यामागे करणी-जादूटोण्याचा संशय व्यक्त केला होता. या पार्श्वभूमीवर ग्रामस्थांनी पेण पोलिस स्‍थानक तसेच महाराष्ट्र अंधश्रद्धा निर्मूलन समिती, पेण यांच्याकडे तक्रार दाखल केली होती. या तक्रारीनंतर महा.अंनिसच्या कार्यकर्त्यांनी ग्रामस्थांशी सविस्तर चर्चा करून घटनेची शहानिशा केली. उपविभागीय पोलिस अधिकारी नालकुल यांच्याशीही या विषयावर सखोल चर्चा करण्यात आली. तसेच ज्यांच्यावर संशय व्यक्त करण्यात आला होता, त्या कुटुंबाचीही भेट घेऊन परिस्थितीची वस्तुस्थिती जाणून घेण्यात आली. सर्व बाबींचा विचार करून गावात भूत, भानामती, करणी व जादूटोणा यामागील तथाकथित चमत्कारांचे वैज्ञानिक स्पष्टीकरण देण्यासाठी प्रबोधनात्मक कार्यक्रम आयोजित करण्याचा निर्णय घेण्यात आला. त्यानुसार बुधवारी (ता. १७) सायंकाळी महाडिकवाडी येथे प्रात्यक्षिकांसह व्याख्यान घेण्यात आले. या व्याख्यानात अंधश्रद्धेच्या मुळावर घाव घालत तर्कशुद्ध व वैज्ञानिक दृष्टिकोनातून मार्गदर्शन करण्यात आले.
.....................
या प्रबोधनाचा सकारात्मक परिणाम दिसून आला असून अशा प्रकारे कोणतीही करणी-जादूटोणा होत नसल्याची स्पष्ट व वैज्ञानिक माहिती मिळाल्याने ग्रामस्थांच्या मनातील भीती पूर्णपणे दूर झाली असल्याचे नागरिकांनी सांगितले. या कार्यक्रमाला ग्रामस्थांची मोठी उपस्थिती होती. यावेळी पोलिस उपनिरीक्षक रसाळ, महा. अंनिसकडून नितीन निकम, प्राचार्य सतीश पोरे, जगदीश डंगर व संदेश गायकवाड उपस्थित होते. ग्रामस्थांनी महा.अंनिस व पोलिसांच्या या उपक्रमाचे कौतुक केले. मंत्र-तंत्र, कोंबडा पुरणे किंवा नारळ फोडून कोणावरही जादूटोणा वा करणी करता येत नाही. याला कोणताही वैज्ञानिक आधार नाही. अशा पद्धतीने कोणी दहशत पसरवत असल्यास महा. अंनिसशी संपर्क साधावा, असे आवाहन कार्याध्यक्ष संदेश गायकवाड यांनी केले आहे.