खोपोली भाजी मंडईचे गणित बिघडले

खोपोली, ता. २३ (बातमीदार) : खोपोली शहरातील मध्यवर्ती महात्मा फुले भाजी मंडईची अवस्था भयानक बनली आहे. सततच्या पावसामुळे सर्वत्र होत प्रचंड पाणी गळती सुरू आहे. त्यातच अस्वच्छतेमुळे भाजी मंडईत सर्वत्र पाणी, चिखल व कचऱ्याचे साम्राज्य निर्माण झाले आहे. यामधूनच नागरिकांना तारेवरची कसरत करून वाट काढावी लागत आहे.
चार दिवसांपासून सुरू असलेल्या मुसळधार पावसामुळे भाजी मंडईची अवस्था बिघडली आहे. पाणीगळती व मोठ्या प्रमाणावर कचरा निर्माण होत आहे. पालिका स्वच्छता विभाग व कर्मचाऱ्यांना दैनंदिन स्वच्छता राखण्यासाठी अडचणी निर्माण होत आहेत. त्यातच रविवार असल्याने ग्राहकांची भाजी मंडईत मोठ्या प्रमाणावर गर्दी झाली होती. मात्र, येथील चिखल, कचरा यामधून वाट काढण्यासाठी त्यांना तारेवरची कसरत करावी लागली. पावसामुळे स्वच्छता ठेवण्यात अडचण निर्माण होत असली तरी पाणी गळती रोखण्यासाठी तात्पुरती व्यवस्था करण्याची नितांत गरज आहे. नगरपालिका आणि येथील व्यापाऱ्यांनी एकत्रित उपाययोजना करण्याची गरज आहे, असे येणाऱ्या ग्राहकांचे म्हणणे आहे.

भाजी मंडईची मुख्य इमारत जीर्ण झाली असून, धोकादायक बनली आहे. दरम्यान भाजी मंडईच्या मुख्य इमारतीला लागून पत्र्याचे शेड उभारण्यात येत आहे. हे काम पूर्ण झाल्यावर धोकादायक इमारतीमधील दुकाने नवीन शेडखाली आणण्यात येतील.
- अनुप दुरे, मुख्याधिकारी, खोपोली