पंढरपूरसाठी ६० जादा बस

पंढरपूरसाठी ६० जादा बस
वारकऱ्यांच्या सेवेकरिता रायगड एसटी महामंडळाकडून नियोजन

महाड, ता. २४ (बातमीदार) : ‘जाता पंढरीसी... सुख लागे जीवा’ असे म्हणत दरवर्षी लाखो वारकरी पंढरीच्या वारीची वाट पाहतात. विठू माउलीच्या भेटीची आस लागलेले रायगड जिल्ह्यातील सुमारे पाच हजार वारकरी ६ जुलैला येणाऱ्या आषाढी एकादशीसाठी पंढरपूरला रवाना होणार आहेत. या वारकऱ्यांच्या सेवेकरिता एसटी महामंडळाकडून जिल्ह्यातून सुमारे ६० जादा गाड्या सोडल्या जाणार आहेत.
कोकणामध्ये या काळात शेतीची कामे सुरू असतात. कोकणातून पंढरपूरला जाणाऱ्या वारकऱ्यांची ही संख्या लक्षात घेता रायगड जिल्हा एसटी प्रशासनाने ६० जादा एसटी बस पंढरपूरला सोडण्याचा निर्णय घेतला आहे. या बसमधून वारकऱ्यांची पंढरपूरला जाण्याची व परत येण्याची व्यवस्‍था केली जाणार आहे. या एसटी बसची बुकिंग सुविधा सुरू करण्यात आली आहे. एखाद्या गावातून ४० वारकऱ्यांची संख्या असेल, तर थेट गावातून वारकऱ्यांसाठी पंढरपूरला जाण्यासाठी व परत येण्यासाठी जादा बस दिली जाणार आहे.
पंढरपूरला जाणाऱ्या जादा बसमध्ये प्रवास करणाऱ्या महिलांना तसेच ज्‍येष्ठ नागरिकांना व इतरांना दिल्या जाणाऱ्या सवलती या प्रवासात कायम ठेवल्या जाणार आहेत. जिल्ह्यातून ६० बस सोडल्या जाणाऱ्या असल्याने सुमारे तीन हजार वारकरी एसटी बसने प्रवास करणार आहेत, तर जिल्ह्यातून पंढरपूरला जाण्याकरिता एकूण पाच हजार वारकरी प्रस्थान करणार आहेत.

पंढरपूरला आषाढी वारीसाठी जिल्ह्यातील आगारांमधून सुमारे ६० जादा बस सोडल्या जाणार आहेत. याशिवाय मागणीनुसार गावातूनही सेवा दिली जाईल. अधिकाधिक वारकऱ्यांनी या सेवेचा लाभ घ्यावा.
- दीपक घोडे, विभागीय नियंत्रक, रायगड

महिलांना ५० टक्के सवलत कायम
गावागावांतून देवदर्शनासाठी महिलांचे ग्रुप मोठ्या संख्येने निघतात. त्यामुळे आषाढी एकादशीनिमित्त पंढरपूरला जाण्यासाठी एसटी बसचे ग्रुप बुकिंग करताना महिलांना तिकीटदरामध्ये असणारी ५० टक्के सवलत कायम ठेवण्यात आली आहे. त्याचप्रमाणे ७५ वर्षांपेक्षा जास्त वय असणाऱ्या ज्येष्ठांना मोफत प्रवास आहे.