आपल्या यकृताचे दान करत मुलींनी दिला वडिलांना पुनर्जन्म

मुलींनी दिला वडिलांना पुनर्जन्म
यकृताचा ६० टक्के भाग दान
सुनील पाटकर
महाड, ता. ९ ः मुलगी जन्माला आली म्हणून समाजात नाक मुरडणारे आजही अनेक जण आहेत; परंतु हीच मुलगी जेव्हा बापाची ढाल बनते, तेव्हा अशा मुलींचा उत्सव साजरा करावासा वाटतो. महाड तालुक्यामध्ये एका मुलीने आपल्या वडिलांना यकृत दान करून जीवदान दिले आहे.
महाड तालुक्यातील चिंभावे येथील भारतीय जनता पक्षाचे जिल्हा उपाध्यक्ष जयवंत दळवी आणि त्यांच्या पत्नी भाजपच्या महिला मोर्चा मंडळ अध्यक्ष प्राजक्ता दळवी यांच्या मुलीने आपल्या वडिलांना पुनर्जन्म दिला आहे. जयवंत दळवी यांना सुमारे दीड वर्षांपूर्वी यकृताचा गंभीर आजार झाला. मुंबईमध्ये उपचारादरम्यान डॉक्टरांनी त्यांना यकृत प्रत्यारोपण करण्याचा सल्ला दिला होता; परंतु काही अडचणींमुळे हे प्रत्यारोपण शक्य झाले नाही. दोन महिन्यांपूर्वी हा त्रास अधिकच वाढल्याने त्यांना गिरगाव येथील रिलायन्स रिचार्ज फाउंडेशनचे सर एच. एन. रुग्णालयामध्ये दाखल करण्यात आले होते. त्यामुळे त्यांना केवळ सहा महिन्यांमध्येच यकृत प्रत्यारोपण करणे आवश्यक असल्याचे डॉक्टरांनी सांगितले. अशावेळी तातडीने अवयवदाता उभा करणे ही एक समस्याच होती; परंतु या वेळी जयवंत दळवी यांची मोठी मुलगी मधुरा कोणताही विचार न करता आपल्या वडिलांसाठी पुढे सरसावली. यानंतर १० जुलैला सर एच. एन. रुग्णालयांमध्ये डॉ. प्रशांत कदम, डॉ. गौरव गुप्ता, डॉ. आकाश शुक्ला आणि डॉ. रवींद्रन् यांनी मधुराच्या यकृताचा ६० ते ७० टक्के भाग काढून त्याचे प्रत्यारोपण जयवंत दळवी यांच्या यकृतात यशस्वीपणे केले. दरम्यान, मधुरासारख्या तरुणीने दाखवलेले धाडस तरुणांमध्ये जबाबदारी व अवयवदानाबाबत जागरूकता निर्माण करणारे आहे.

मधुरा ही २२ वर्षांची असून ती सध्या नवी मुंबईतील तेरणा अभियांत्रिकी महाविद्यालयामध्ये सिव्हिल इंजिनिअरिंगच्या तिसऱ्या वर्षात शिक्षण घेत आहे. आता मधुरा व जयवंत दळवी यांच्या प्रकृतीमध्ये सुधारणादेखील होत आहे. येत्या काही दिवसांमध्ये महाविद्यालयात शिक्षणासाठी पुन्हा दाखल होण्याची तयारीदेखील मधुराने केली आहे.

फोटो
जयवंत दळवी आणि त्यांना यकृताचे दान करणारी त्यांची मुलगी मधुरा.