वरंध गावात विविध ठिकाणी पाच महिला उद्या करणार ध्वजारोहण, गतवर्षीपासून सुरू आहे उपक्रम

ध्वजारोहणाचा मान महिलांना
वरंध ग्रामपंचायतीचा आदर्श उपक्रम
महाड, ता. १४ (बातमीदार) : गावांमधील वेगवेगळ्या ठिकाणी ध्वजारोहण करण्याचा मान महिलांना मिळावा यासाठी आदर्श गाव असलेल्या वरंध ग्रामपंचायतीने पुढाकार घेतला आहे. मागील वर्षापासून ग्रामपंचायतीने ध्वजारोहणाचा मान महिलांना देण्याचा उपक्रम सुरू केला आहे. यावर्षीही ग्रामसभेमध्ये ध्वजारोहणाचा मान पाच महिलांना देण्याचे निश्चित केले आहे. त्यानुसार शुक्रवारी (ता. १५) स्वातंत्र्यदिनी वरंध ग्रामपंचायत हद्दीतील विविध ठिकाणी या महिला ध्वजारोहण करणार आहेत.
स्वातंत्र्यदिनानिमित्त वरंध ग्रामपंचायतीची ग्रामसभा घेण्यात आली. या सभेत आदिशक्ती अभियान यशस्वी व्हावे या हेतूने चिठ्ठ्या टाकून ध्वजारोहण करण्यासाठी पाच महिलांची नावे निश्चित करण्यात आली आहेत. या चिठ्ठ्यांनुसार ग्रामपंचायत कार्यालयात ध्वजारोहण साधना धनवडे, वरंध प्राथमिक शाळेत ध्वजारोहण मंगल मुकणे, धरणवाडी प्राथमिक शाळेत ध्वजारोहण शारदा पवार, कुंभार कोंड प्राथमिक शाळेत ध्वजारोहण रेखा धनावडे, तर आदिवासी शाळेतील ध्वजारोहण रंजना देशमुख यांच्या हस्ते होणार आहे. आदर्श गाव संकल्पनेतून वरंध ग्रामपंचायतीने सुरू केलेल्या या आगळ्या-वेगळ्या उपक्रमाचे परिसरामध्ये कौतुक होत आहे.

आदिशक्ती अभियान
वरंध ग्रामपंचायतीमध्ये एकूण ४२ महिला बचत गटातून दोन ग्राम संघ कार्यरत आहेत. यामध्ये महिलांची संख्या सुमारे ४५० इतकी आहे. महिलांनादेखील ध्वजारोहणाचा मान मिळावा यासाठी वरंध ग्रामपंचायतीने गतवर्षीपासून आदिशक्ती अभियान सुरू केले असल्याची माहिती सरपंच जयवंत देशमुख यांनी दिली.