राज्यभरात करिअर शिबीर

मुंबई, ता. २ : व्यवसाय शिक्षण व प्रशिक्षण संचालनालयामार्फत विद्यार्थी व तरुणांसाठी राज्यातील २८८ मतदारसंघांत छत्रपती शाहू महाराज युवाशक्ती करिअर शिबिराचे आयोजन करण्यात आले आहे. ६ मे ते ६ जूनदरम्यान हे शिबीर पार पडणार आहे. कुशल महाराष्ट्र, रोजगारयुक्त महाराष्ट्र घडवण्याच्या उद्देशाने कौशल्य, रोजगार, उद्योजकता व नावीन्यता विभागांतर्गत हे शिबीर घेण्यात येणार असल्याचे सांगितले गेले.

नवीन शैक्षणिक वर्ष आता सुरू होत असून त्या पार्श्वभूमीवर विद्यार्थ्यांसाठी उपलब्ध असलेल्या करिअरविषयक विविध संधींची माहिती या शिबिरांमधून दिली जाणार आहे. यामध्ये विद्यार्थी, युवक-युवतींसह पालकांचेही करिअरविषयक विविध संधींसंदर्भात समुपदेशन केले जाणार आहे, अशी माहिती कौशल्य विकास मंत्री मंगलप्रभात लोढा यांनी दिली. राज्यातील ग्रामीण, शहरी अशा सर्व भागांतील विद्यार्थी, युवक-युवती व पालकांनी या शिबिरांमध्ये सहभागी व्हावे व बदलत्या काळास अनुसुरून ठिकठिकाणी सुरू झालेल्या विविध शैक्षणिक, व्यावसायिक इत्यादी अभ्यासक्रमांची माहिती जाणून घ्यावी, असे आवाहन मंत्री लोढा यांनी केले. या संधीचा लाभ घेण्यासाठी स्थानिक औद्योगिक प्रशिक्षण संस्थेशी (आयटीआय) संपर्क साधावा, तसेच सोबत जोडलेल्या क्यूआर कोडच्या माध्यमातून जास्तीत जास्त विद्यार्थ्यांनी, युवक-युवतींनी नोंदणी करून शिबिरात सहभागी व्हावे, असे आवाहन लोढा यांच्यासह विभागाच्या प्रधान सचिव मनिषा वर्मा, कौशल्य विकास आयुक्त डॉ. रामास्वामी एन., व्यवसाय शिक्षण व प्रशिक्षण संचालक दिगांबर दळवी यांनी केले आहे.
--
आयटीआय अभ्यासक्रमांचीही माहिती
आयटीआय व्यवसाय अभ्यासक्रम, अभियांत्रिकी व तंत्रनिकेतन अभ्यासक्रम, महाराष्ट्र राज्य कौशल्य विद्यापीठ व त्यातील विविध अभ्यासक्रम, शैक्षणिक कर्ज व शिष्यवृत्तीविषयक विविध योजना, रोजगार व स्वयंरोजगारविषयक विविध योजना, स्थानिक शैक्षणिक संस्था आदींविषयी या शिबिरांमधून सविस्तर मार्गदर्शन देण्यात येणार आहे. परदेशातील उच्च शिक्षणासंबंधीही मार्गदर्शन देण्यात येणार आहे.