दिवाळीच्या सुट्टयानंतर मुंबई आणि परिसरात शाळा पुन्हा गजबजल्या

दिवाळीच्या सुट्ट्यांनंतर शाळा पुन्‍हा गजबजल्या
मुंबई, ता. २८ : दिवाळीच्या तब्बल दोन आठवड्यांच्या सुट्ट्यांनंतर मुंबईसह उपनगरांतील शाळा आणि महाविद्यालये मंगळवारी पुन्हा गजबजबली. दुसऱ्या सत्रातील शाळेच्या पहिल्या दिवशी मुलांना थेट अभ्यासक्रम शिकवण्यापेक्षा त्यांचे स्वागत करून त्यांचा उत्साह वाढवण्यासाठी अनेक शाळांमध्ये कार्यक्रमांचे आयोजन करण्यात आले होते.
इंग्रजी आणि केंद्रीय शिक्षण मंडळाच्या शाळांची दिवाळी सुट्टी मागील आठवड्यातच संपली आहे; मात्र शिक्षण विभागाने घेतलेल्या निर्णयानुसार राज्य शिक्षण मंडळाच्या अखत्‍यारीत येणाऱ्या तसेच महापालिका शिक्षण विभागाच्या शाळा आणि कनिष्ठ महाविद्यालयांची दिवाळी सुट्टी संपल्यानंतर त्या पुन्हा सुरू झाल्या आहेत. यात मुंबईतील हिंदी, उर्दू, गुजराती, कन्नड, तेलगू आदी माध्यमांच्या शाळांचा समावेश आहे.

दिवाळीच्या सुट्टीनंतर राज्यातील सर्व शाळांमध्ये दुसरे सत्र सुरू होते. त्यानुसार अभ्यासक्रम, पुस्तके याचे नियोजन शिक्षकांकडून यापूर्वीच करण्यात आले असल्याने त्याचीही सुरुवात करण्यात आली आहे.
- राजेश कंकाळ, शिक्षणाधिकारी, पालिका

उपक्रमांचे आयोजन
मुंबईतील शाळांतील मुलांच्या आरोग्यासंदर्भात अनेक उपक्रम सुरू आहेत. शिवाय गुणवत्तेसोबत शाळांचा दर्जा वाढवण्यासाठी अनेक प्रयत्न सुरू असून दिवाळीनंतरच्या या दुसऱ्या सत्रातही अनेक उपक्रम राबवले जाणार असल्याचे शिक्षणाधिकारी राजेश कंकाळ यांनी सांगितले.