दक्षिण मुंबईतील काही भागांत पाणीकपात

सकाळ वृत्तसेवा
मुंबई, ता. २९ : मलबार हिल जलाशयाची अंतर्गत पाहणी रुरकी येथील भारतीय तंत्रज्ञान संस्‍थेच्‍या प्राध्‍यापकांमार्फत सोमवार (ता. ३ जून) आणि मंगळवारी (ता. ४ जून) करण्यात येणार आहे. त्या अनुषंगाने मलबार हिल जलाशयाचा कप्पा क्रमांक एक आणि दोन टप्प्याटप्प्याने रिक्त करण्‍यात येणार आहे. त्‍यामुळे सोमवार ते मंगळवारी ए, सी, डी, जी दक्षिण आणि जी उत्तर विभागातील काही भागांच्‍या पाणीपुरवठ्यात कपात केली जाणार आहे.

महानगरपालिकेकडून मलबार हिल जलाशयाच्या पुनर्बांधणीचे काम हाती घेण्यात येणार आहे. मलबार हिल जलाशयाच्या कामाचे पुनर्विलोकन करण्यासाठी स्थापन केलेल्या आधीच्या विशेषज्ञ समितीने प्रस्तुत केलेल्या अहवालांचे विश्‍लेषण करण्यासाठी आणि मलबार टेकडी जलाशयातून मुंबई शहराला होणारा पाणीपुरवठा बाधित न करता जलाशयाच्या कामाची योग्य कार्यपद्धती सुचविण्याकरिता महापालिकेतर्फे रुरकी येथील भारतीय तंत्रज्ञान संस्‍था (आयआयटी) या स्थापत्य अभियांत्रिकीतील मान्यताप्राप्त संस्थेची नियुक्ती करण्यात आली आहे.

मलबार हिल जलाशयाचा कप्पा क्रमांक एक आणि दोन टप्प्याटप्प्याने रिक्त करणे आवश्यक आहे. मलबार हिल जलाशयाची अंतर्गत पाहणी दोन दिवस केली जाणार आहे. या पाहणी कामकाजामुळे ए, सी, डी, जी उत्तर आणि जी दक्षिण विभागातील काही परिसरांतील पाणीपुरवठ्यात कपात करण्यात येणार आहे. या कामामुळे काही ठिकाणी पाण्‍याचा दाब कमी राहील. पाणीकपातीदरम्‍यान जलाशयातील पातळी लक्षात घेऊन आवश्‍यकता भासल्‍यास विभागवार पाण्‍याच्‍या वेळेत बदल करण्‍यात येईल. संबंधित परिसरातील नागरिकांनी पाण्‍याचा पुरेसा साठा करावा. पाणी जपून व काटकसरीने वापरावे, असे आवाहन महापालिका प्रशासनातर्फे करण्‍यात आले आहे.
.........