व्यावसायिकाची २५ लाखांची लुट

व्यावसायिकाची २५ लाखांची लूट
तोतया पोलिसांसह नऊ जणांवर गुन्हा नोंद

मुंबई, ता. २ : ‘गुंतवणुकीवर दुप्पट पैसे देऊ’ या प्रलोभनास भुलून २५ लाख रुपये घेऊन मुंबईत आलेल्या पुण्यातील व्यावसायिकाला कुर्ला परिसरात लुटण्यात आले. ही लूट पोलिसांच्या वेशात आलेल्या अनोळखी तरुणांनी केली. ही घटना बुधवारी (ता. ३०) कुर्ला, पूर्व द्रुतगती महामार्गावर घडली. या प्रकरणी नेहरूनगर पोलिसांनी नऊ परिचित, अपरिचित आरोपींविरोधात गुन्हा नोंद केला असून, आरोपींचा शोध सुरू असल्याचे पोलिसांनी सांगितले.

प्राथमिक चौकशीत दुप्पट रक्कम लगेच मिळणार होती, अशी माहिती मिळत आहे. त्यावरून हा सौदा बनावट नोटांचा तर नव्हता ना, हेही तपासले जात आहे. तपास प्रगतिपथावर असून, आरोपी हाती येताच या सर्व बाबींचा उलगडा होईल, असे वरिष्ठ पोलिस निरीक्षक अंकुश खेडकर यांनी सांगितले. दरम्यान, पोलिस ठाण्यातून मिळालेल्या माहितीनुसार पुण्याच्या नारायण पेठेत राहणारे इस्टेट एजंट म्हणून काम करणारे सतीश खांबे यांना गुंतवणूक दुप्पट करून मिळेल, असे प्रलोभन मुंबईतील प्रवीण मुंगसे नावाच्या व्यक्तीने दिले. चलनात येतील अशा दुप्पट नोटा देऊ, असे त्याचे म्हणणे होते. खांबे आणि त्यांचा मित्र अमित कारंडे यांनी मिळून २५ लाख रुपये या योजनेत गुंतवण्याचे ठरवले. त्यानुसार ३० एप्रिल रोजी ते ही रक्कम घेऊन मुंबईत आले. खासगी वाहनात बसून मुंगसे व त्याच्या अन्य दोन सहकाऱ्यांशी चर्चा करत असताना अचानक शेजारी एक कार येऊन थांबली, त्यातून चार ते पाच तरुण उतरले. त्यांच्या हाती पोलिसांप्रमाणे काठ्या होत्या. ते पोलिस आहोत, असे ओरडून सांगत होते. त्यातल्या एकाने खांबे यांच्या हातातील २५ लाख रुपये असलेली बॅग हिसकावली आणि ही मंडळी आली तशी निघूनही गेली.

आरोपी ठाण्याच्या दिशेने पसार
सतीश खांबे यांनी आरोपीच्या कारचा चार ते पाच किलोमीटर पाठलाग केला, मात्र ठाण्याच्या दिशेने वेगाने निघालेले आरोपी पसार झाले. चौकशी न करता फक्त पैशांनी बॅग घेऊन गेल्याने ते पोलिस नसावेत, हा सर्व कट मुंगसे याने रचला असावा, असा संशय खांबे यांनी व्यक्त केल्याचे पोलिसांनी सांगितले.