अतिक्रमण करणाऱ्यांच्या माथी पडणार कारवाईचा खर्च

अतिक्रमण करणाऱ्यांच्या माथी कारवाईचा खर्च
‘अतिक्रमण हटाव’चा खर्च म्हाडा संबंधितांकडून वसूल करणार; नोटीसची कार्यवाही सुरू, लाखोंचा महसूल जमा होणार
सकाळ वृत्तसेवा
मुंबई, ता. १७ : म्हाडाच्या रिकाम्या जागांवर अतिक्रमण करणाऱ्यांविरोधात म्हाडाने धडक कारवाई करीत अनेक बांधकामे जमीनदोस्त केली आहेत. त्यानंतर आता अतिक्रमण हटाव मोहिमेचा खर्च संबंधित अतिक्रमणधारकांच्या माथी मारण्याचा निर्णय म्हाडाने घेतला आहे. त्यानुसार जवळपास ६० हून अधिक प्रकरणांत खर्चाच्या वसुलीसाठी संबंधितांना नोटीस देण्याची कार्यवाही सुरू केली आहे. त्यामुळे म्हाडाला लाखो रुपयांचा महसूल मिळणार आहे.
मुंबई शहर आणि उपनगरांत ठिकठिकाणी म्हाडाचे रिकामे भूखंड, वसाहती आहेत. दरम्यान, अनेक जण म्हाडाला न जुमानता अतिक्रमण करीत बेकायदा बांधकाम करीत आहेत. त्याविरोधात म्हाडाकडून वेळोवेळी निष्कासन कारवाई केली जाते. त्यासाठी म्हाडाचा स्वतंत्र अतिक्रमण निर्मूलन कक्ष कार्यरत आहे. २०२४ पासून आतापर्यंत या कक्षाने ६० हून अधिक अनधिकृत बांधकामांवर कारवाई केली आहे. त्यासाठी पोलिस बंदोबस्त, कामगार, मशीन असा मोठ्या प्रमाणात खर्च होतो. तो वसूल करण्यासाठी आता म्हाडाने कंबर कसली असून, संबंधितांना नोटीस देत कारवाईच्या खर्चाची रक्कम भरण्याबाबत बजावले आहे.

दिवसाचा खर्च एक लाख ६६ हजार
अतिक्रमणावर निष्कासन कारवाई करणाऱ्या पथकात पोलिस बंदोबस्त, एमएसएफचे जवान, म्हाडाचे अधिकारी, कर्मचारी, कामगार असे मनुष्यबळ जेसीबी, डंपर अशी विविध यंत्रणा लावावी लागते. त्यामुळे एका दिवसाचा सुमारे एक लाख ६६ हजार एवढा खर्च येतो. त्यामुळे हा खर्च संबंधित अतिक्रमणधारकांकडून वसूल केला जाणार आहे.

गुन्हे दाखल करणार
म्हाडाने सध्या अतिक्रमण करवाईच्या खर्चाच्या वसुलीसाठी नोटिसा दिल्या असून, सात दिवसांत संबंधितांनी खर्च भरणे बंधनकारक आहे. त्यानंतरही हा खर्च न भरल्यास पुन्हा नोटिस दिली जाणार असून, त्यानंतरही रक्कम म्हाडाकडे न भरल्यास म्हाडाकडून गुन्हे दाखल केले जातील, असे म्हाडाच्या अतिक्रमण निर्मूलन कक्षाच्या अधिकाऱ्याने सांगितले.