रतन टाटांच्या मालकीच्या दोन्ही समभागांची समान वाटणी

रतन टाटांच्या मालकीच्या दोन्ही समभागांची समान वाटणी
सकाळ वृत्तसेवा
मुंबई, ता.२४ : दिवंगत उद्योगपती रतन टाटांच्या मालकीच्या दोन्ही समभागांवर रतन टाटा एंडोमेंट फाउंडेशन आणि रतन टाटा एंडोमेंट ट्रस्ट यांचा समान हक्क असेल, असे उच्च न्यायालयाने स्पष्ट केले आहे. समभागांचा त्यांच्या मृत्युपत्रात उल्लेख नाही. विशेषतः ते वितरितही केलेले नव्हते.

टाटा यांच्या मृत्युपत्राची कायदेशीर वैधता निश्चित करण्यासाठी दाखल प्रोबेट कार्यवाहीत न्या. मनीष पितळे यांच्या एकलपीठाने उपरोक्त निर्णय दिला. टाटा यांच्या २३ फेब्रुवारी २०२२ रोजीच्या मृत्युपत्रातील काही तरतुदींचा अर्थ कसा लावायचा हे न्यायालयाने स्पष्ट करावे, अशी मागणी टाटा यांच्या मृत्युपत्राच्या अंमलबजावणीची जबाबदारी असलेल्या त्यांच्या बहीण शिरीन जिजीभॉय यांनी याचिकेतून केली होती. त्यानंतर, मृत्युपत्राच्या प्रोबेट कार्यवाहीच्या वेळी न्यायालयाने टाटा यांच्या मृत्युपत्रातील त्यांच्या मालकीच्या सूचीबद्ध आणि सूचीबद्ध नसलेल्या दोन्ही समभागांवर रतन टाटा एंडोमेंट फाउंडेशन आणि रतन टाटा एंडोमेंट ट्रस्ट यांचा समान हक्क असेल, असे स्पष्ट केले. तसेच, त्यानुसार मृत्युपत्रात सुधारणा करण्यात आली.